DILI, 10 jullu 2020 (TATOLI) – Reprezentante Vatikanu iha Timor-Leste, Núnsiu Apostóliku Monseñor Marco Sprizzi, hateten Papa Francisco sei halo vizita ofisiál mai Timor-Leste, maibé tanba krize pandemia COVID-19 maka halo adia viajen ne’e.
“Papa Francisco hakarak vizita Timor-Leste tinan ne’e, viajen ne’e la kansela maibé adia tanba viajen ne’e tau ona iha ajenda,” tenik Monseñor Marco Sprizzi iha Palásiu Governu hafoin hasoru malu ho Primeiru-Ministru, Taur Matan Ruak, sesta ne’e.
Tanba ne’e, tuir Núnsiu Apostóliku ne’e, presiza supera krize ne’e hamutuk atu bele realiza vizita Papa Francisco iha nasaun joven ne’e.
“Agora daudaun, Papa Francisco kontinua akompaña situasaun Timor-Leste, nia reza no fó bensa nasaun no povu Timor-Leste,” nia akresenta.
Kona-ba loron vizita, Monseñor Marco Sprizzi dehan seidauk bele determina tanba depende evolusaun pandemia globál.
“Loron ita labele hatene tanba depende ba andamementu Coronavírus iha mundu. Tanba bainhira Papa Francisco mai sei iha ema barak hamutuk iha fatin ida. Ita tenke iha serteza, katak iha ona vasina no iha kondisaun seguransa ba ema hotu. Entaun depende kondisaun, nune’e povu bele partisipa sein risku kontájiu, maibé espera bele realiza iha tinan oin,” nia subliña.
Nia refere, iha ámbitu kooperasaun Timor-Leste ho Vatikanu no igreja katólika, sempre serbisu hamutuk ba bem estar no sustentabilidade povu.
“Ita iha kooperasaun iha edukasaun, saúde no akompañamentu ba kbiit laek sira,” nia hatutan.
Marco Sprizzihaktuir, enkontru ohin tuir konvite husi Xefe Governu, atu partilla kona-ba atividade Governu, rezolusaun krize polítika, kompleta estrutura Governu, programa Governu no Rekuperasaun Ekonómiku inklui difikuldade hasoru krize COVID-19.
Jornalista: Natalino Costa
Editora: Julia Chatarina
