DILI, 16 jullu 2020 (TATOLI)-Governu liuhosi Ministru Ensinu Superiór Siénsia no Kultura (MESSK), Longuinhos dos Santos, husu ba Retoriál Universidade Nasionál Timor Lorosa’e (UNTL) atu rezolve kestaun propinas ho estudante sira.
“Ita haruka karta rua ho kontiudu la hanesan ida desizaun ba estudante sira atu kumpre ninia obrigasaun (selu propinas) no karta seluk husu fleksibilidade UNTL nian atu haree modalidade ne’ebé Mak Governu propoin,”dehan Governante iha Palacio do Governo Dili, kuarta ne’e.
Notísia Relevante :Estudante UNTL La Satisfas ho Aplikasaun Propinas Durante EE
Nia dehan garante UNTL bele rezolve lalais kestaun ne’e iha tempu badak.
Entretantu, antes ne’e Pro Reitór Asuntu Akadémiku UNTL, Miguel Maia, relata UNTL simu ona karta ida husi Ministériu Ensinu Superiór Siénsia no Kultura (MESSK) ne’ebé suzere atu estudante sira kontinua selu propinas ba universidade.
Notísia Relevante :UNTL Anula Propinas ba Estudante
Nia dehan kontiudu husi karta ne’ebé maka Ministru Ensinu Superiór Siénsia no Kultura Longuinhos dos Santos, fó sai seidauk klaru atu estudante sira tenki selu propinas ka lae tanba ne’e presiza konfirmasaun filafali ho Governu.
“Kontiudu husi karta ne’ebé ami simu husi MESSK ne’e suzere atu selu tanba haree ba defisit governu bazeia ba konkordansia ne’ebé la’o ona iha primeiru governu katak pursentu 70 governu mak responsabiliza no pursentu 30 UNTL rasik mak tenke sustenta,” dehan nia ba Tatoli, iha ninia servisu fatin segunda ne’e.
Notísia Relevante :MESSK Suzere Estudante UNTL Selu Propinas
Tanba ne’e, parte UNTL sei konfirma filafali kestaun ne’e ho MESK iha tempu badak nune’e bele iha desizaun loloos hodi implementa.
Jornalista : Tomé Amado
Editór : Agapito dos Santos
