DILI, 16 jullu 2020 (TATOLI)- Portavós Komandu Polísia Nasionál Timor-Leste (PNTL), Superintendente Xefe Arnaldo de Araújo, esklarese katak autoridade Polísia Munisípiu Manufahi kaptura membru Kmanek Oan Rai Klaran (KORK) na’in-66 tanba halo atividade treinu ilegál sein koñesimentu hosi PNTL.
Arnaldo dehan, membru KORK na’in-66 ne’e kompostu hosi feto na’in-rua (2), idade adultu na’in-49 no menoridade na’in-17.
Ema hirak ne’e PNTL kaptura iha loron 15 jullu 2020, bainhira hala’o hela atividade ezame sa’e sintu no halo juramentu iha Aldeia Turon, Suku Babulo, Postu Administrativu Same.
“Agora daudaun ita nia polísia sira sei halo hela investigasaun kle’an hodi buka hatene razaun sira nia atividade treinu ne’e,” informa Arnaldo de Araújo, ba jornalista iha Komandu Jerál PNTL, Caicoli, Dili.
Nia hatutan, PNTL mós halo apreensaun ba atributu KORK nian kompostu hosi farda, sintu no atributu seluk tan.
Antes ne’e Komandante Komandu Polísia Manufahi, Superintendente Joni Viana das Regras dehan, membru KORK na’in hirak ne’e halo ona investigasaun oras 72 hodi aprezenta ba Ministériu Públiku.
Kona-ba menoridade na’in 17 ne’e, Joni Viana Regras, informa, parte PNTL sei haree sira nia direitu tuir lei.
Jornalista : Eugénio Pereira
Editór : Francisco Simões
