DILI, 17 jullu 2020 (TATOLI)-Estrutura Liga Futeból Amadora (LFA) tuir planu sei halo kongresu nasionál hodi hili orgaun ezekutivu no Prezidente iha loron 15 fulan-agostu 2020 iha Dili.
Prezidente LFA, Nilton Gusmão, hatete tuir loloos kongresu ne’e hala’o ona iha fulan-marsu liubá maibé tanba surtu COVID-19 tenki adia to’o ohin loron.
Notísia Relevante :LFA Adia Kongresu iha Abríl
“Ami hanoin ona atu halo iha loron 15 agostu ida ne’e data tentativa tanba ami-nia mandatu ramata ona, ita tenke halo kongresu para hili fali orgaun ezekutivu ho prezidente foun hafoin bele organiza fali liga,” dehan, Nilton, hafoin relata programa LFA nian ba Sekretáriu Estadu Juventude no Desportu (SEJD), iha Lecidere, sesta ohin.
Nia dehan Governante konkorda ho data kongresu ne’e, tanba ne’e mak LFA sei hahú halo ona preparasaun ba eventu ne’e.
Liga Futeból Amadora (LFA) estabelese iha 2015, no lidera husi Emprezariu Timoroan, Nilton Gusmão ho ninia estrutura iha ne’ebé mandatu ramata ona iha 2019.
Iha tinan kotuk la konsege hili estrutura foun tanba Eis Sekretáriu Estadu Juventude no Desportu, Nélio Isaak Sarmento, hodi estende tan to’o 2020.
Jornalista : Hortencio Sanchez
Editór : Agapito dos Santos
