DILI, 16 jullu 2020 (TATOLI)—Prezidente Komisaun A (Justisa no Konstitusionál), Deputadu Joaquim dos Santos, hateten bainhira projetu-lei Medida Prevensaun no Kombate Korrupsaun (MPCC-sigla portugés) vigora, hahú hosi Xefe Departamentu to’o Prezidente Repúblika nia rikusoin seidauk bele deklara ba públiku tanba instituisaun estadu foin mak harii no presiza kria kondisaun.
Notísia Relevante: LAC Artigu 28, Obriga Sidadaun ho Kargu Públiku Tenke Deklara Rikusoin
Nia esplika, ohin (kinta, 16 jullu 2020), mosu pro no konta entre membru komisaun A kona-ba deklarasaun rikusoin hosi deklarante sira-ne’e, iha opiniaun tolu mak; ida dehan atu fó hotu ba Komisaun Antí Korrupsaun (CAC-sigla portugés).
Deputadu Bankada FRETILIN ne’e subliña, opiniaun ida husu fó hotu ba tribunál, opiniaun ida tán di’akliu fahe rua katak órgaun soberania sira ba tribunál no CAC depois deklarante sira seluk ba CAC.
Prezidente Komisaun A ne’e haktuir, tetu-ba tetu-mai iha ligasaun ho problema tékniku, polítiku no jurídiku, entaun komisaun A hola opsaun hodi deside tenke fahe ba autoridade kompetente ba rua; kompostu hosi Tribunál no CAC hodi simu deklarasaun no halo verifikasaun ba deklarante sira-nia deklarasaun rikusoin.
Tanba ne’e, nia dehan, órgaun soberanu sira hanesan deputadu, membru Governu, Prezidente Repúblika no CAC sira-nia mós haruka ba Tribunál Supremu Justisa (TSJ), sira seluk ne’e lori ba CAC.
Nia esplika, iha reuniaun horisehik problema seluk dehan loke ba públiku atu hotu bele asesu ba deklarante sira-nia bens (soin) ka lae, asuntu ne’e iha opiniaun rua kuaze hanesan.
Iha reuniaun ne’e, nia haktuir, grupu ida hakarak loke ba públiku kona-ba saida mak xefe departamentu to’o Prezidente Repúblika iha, nune’e públiku bele hatene hodi bele halo kontrolu sosiál.
Notísia Relevante: Artigu 27, LAC Fó Kompeténsia ba CAC Atu Simu Deklarasaun Bens no Interese
Iha opiniaun seluk, nia haklaken, mak dehan lalika lai tanba ita-nia instituisaun sira foin mak harii, presiza kria kondisaun. Entaun, ita fó tempu ba tinan tolu (3) ka tinan haat (4) kuandu kondisaun iha ita bele revoga lei ne’e hodi bele loke soin (riku) ba públiku.
Entaun, nia informa, desizaun ikus komisaun A deside lei ne’e tama ein vigór deklarasaun sira-ne’ebé deklarante sira halo hosi Xefe Departamentu ba to’o Prezidente Repúblika hotu-hotu feixadu katak taka ba públiku.
Nia dehan, kuandu órgaun judisiáriu presiza informasaun liga ba investigasaun kriminál ruma entaun tribunál haruka despaxu ba loke sira-nia rikusoin ne’e iha tribunál.
Notísia Relevante: LAC Artigu 26 Kontrola Ema ho Kargu Públiku Nia Rikusoin
Jornalista : Evaristo Soares Martins
Editór : Cancio Ximenes
