DILI, 20 jullu 2020 (TATOLI)-Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, iha ámbitu aniversáriu Agência TATOLI,IP nian ba da-haat iha tinan ne’e, husu jornalista tenke hato’o notísia ne’ebé mak independente no kredivel.
Ezekutivu ne’e konsidera katak durante ne’e INSS serbisu ho jornalista sira di’ak no kapás tebes tanba ne’e mak INSS sempre iha tempu ba jornalista sira atu hetan informasaun kona-ba INSS nian.
“Ho nune’e, ha’u husu katak sai jornalista tenke hato’o notísia ne’ebé mak independente, kredivél no labele fó sai informasaun hosi fontes ne’ebé mak ladún klaru. Ho ne’e, husu atu mantein nafatin professionalizmu hanesan jornalista atu nune’e hato’o ita-nia lian ba komuniadde sira ho loloos, justu no akurasia”, Prezidente Konsellu Administrasaun (INSS), Longuinhos Armando Leite via telefónika ba Agência TATOLI, ohin.
Nia dehan, observsaun ba notísia iha Online TATOLI, notísia ne’e independente duni no laiha intervensaun hosi partidu polítiku no notísia hotu atuál.
“Notísia fó-sai ida atuál tanba tuir ha’u haree no asesu katak sempre fó-sai ida foun nunka mais fó sai notísia kle’ur nian. Entaun, ho ida ne’e ema hakarak lee notísia ne’e, ema la gosta notísia ida ria kle’ur nian ne’e”, Prezidente INSS dehan.
Tanba ne’e, lider másimu INSS ne’e husu ba jornalista iha TATOLI atu servisu ho parsialidade no labele hamenus no labele aumenta ema-nia hanoin ba públiku sira tanba konsidera bainhira fó-sai notísia ne’ebé mak laloos mak ikus ne’e nia impaktu mak ba fonte informasaun sira.
“Tanba ne’e husu ba ita-boot jornalista sira atu servisu ho parsiál katak labele inventa no labele hamenus. Se lae, informasaun hotu ne’ebé mak públika ne’e nia impaktu mai ami ne’ebé fó imi informasaun ne’e”, nia konsidera.
Notísia relevante:TATOLI Halo Ona Balansu Iha Publikasaun
Jornalista : Osória Marques
Editor : Rafy Belo
