DILI, 21 jullu 2020 (TATOLI)-Estudante Naun Bolseiru Timoroan iha Portugal oras ne’e simu ona subsídiu ne’ebé maka transfere ona husi Governu foinlalais relasiona ho pandemia globál COVID-19.
Estudante Leticia de Jesus Vilanova, hateten simu ona subsídiu husi Governu ba fulan tolu nian hamutuk $ 1.500.
Notísia Relevante :MF Transfere Ona Subsídiu ba Estudante iha Estranjeiru
“Ha’u nudar estudante ne’ebé mak la Bolseiro, iha ne’e ha’u hkarak informa kona-ba subsidio husi COVID – 19 nian ne’e, fulan ida hau simu $500.00 entaun bazeia ba durasaun Estadu emergensia nian ne’e tuir decreto Lei 9/2020, 29 de Maio to’o fali fulan-jullu ne’e ha’u simu $1,500 ne’e fulan-tolu nian, osan transferênsia ba konta ho montante €1,324.99,”informa nia via mídia sosiál whatsAPP, tersa ne’e.
Nia dehan ho subsídiu ne’e bele responde ona sira-nia nesesidade durante auto-kuarentena iha uma.
“Kona-ba subsídiu ne’e sufisiente ne’ebé mak ajuda tebes ami-nia presiza durante kuarentena iha uma de’it,”tenik estudante Timoroan ne’e.
Notísia Relevante :Estudante Rihun Rua Mak Sei Hetan Subsidiu
Leticia dadauk ne’e estuda iha Universidade Évora Portugal iha área Turizmu no tama ona semester IV.
“Hau eskola iha universidade Évora agora daudaun ha’u segundu anu semestre haat no agora hau akaba ona tinan ida ne’e no tinan oin ha’u kontinua terseiru anu semester lima,”nia esplika.
Notísia Relevante :Subsídiu Ba Estudante Naun Bolseiru Iha Rai-Li’ur Depende ba Kustu Vida Kada Nasaun
Jornalista : Hortencio Sanchez
Editór : Agapito dos Santos
