DILI, 22 jullu 2020 (TATOLI) – Relasiona ho Projetu Proposta Rezolusaun ba ratifikasaun kona-ba akordu servisu aéreu entre Governu Timor-Leste no Governu Austrália ne’ebé Konsellu Ministru (KM) aprova ona, tuir Ministra Negósiu Estranjeiru no Kooperasaun, Adaljiza Magno, nu’udar meiu ida atu loke-an ba empreza transporte aéreu sira atu mai iha Timor-Leste.
Inisiativa ne’e atu fasilita Timor-Leste ho Austrália halo akordu servisu aéreu hanesan akordu bilaterál, tanba ne’e presiza tenke ratifikasaun hosi Parlamentu Nasionál Tanba parte Parlamentu Austrálianu ratifika ona.
“Ita seidauk ratifika ne’ebé ami husu rezolusaun ba Governu no aprova ona, nune’e ami bele lori ba Parlamentu atubele ratifika no ita bele troka nota hodi akordu ne’e bele entra ein vigór,” tenik Ministra Adaljiza iha Palásiu Governu, kuarta ne’e.
Ministra haktuir, kontiúdu akordu ne’e atu hafasil Austrália lori nia kompañia transporte aéreu tama mai iha Timor-Leste.
Bainhira Parlamentu Nasionál ratifika no akordu entra ein vigór maka kompañia aéreu sira bele tama mai Timor-Leste hodi semo iha kalohan no bele tun halo tránzitu inklui funsionamentu aeroportu internasionál Timor-Leste hanesan iha rai seluk.
“Ita nakloke liután ba kompañia aéreu sira atu fó empregu no karik kompañia balun hakarak loke edifísiu iha ita-nia rai. Portantu ida-ne’e vantajen ida, ita sei la halo de’it ho Austrália maibé ita sei halo ho Indonézia, Singapura no ita estuda hela atubele halo ho Nova Zelándia,” nia subliña.
Objetivu husi akordu ne’e atu asegura liután nível seguransa no protesaun internasionál, hodi reafirma preokupasaun séria ba hahalok no ameasa kontra seguransa aviaun sira nian ne’ebé fó risku ba ema no propriedade seguransa inklui afeta maka’as ba funsionamentu transporte aéreu no konfiasa públiku nian ba seguransa aviasaun sivíl.
Akordu ne’e, buka mós atu promove sistema aviasaun internasionál ida ne’ebé bazeia ba konkorénsia entre empreza transporte aéreu sira iha merkadu entre hodi enkoraja empreza sira dezenvolve no implementa servisu ne’ebé kompetitivu.
Jornalista: Florêncio Miranda Ximenes
Editora: Julia Chatarina
