DILI, 22 jullu 2020 (TATOLI)–Governu liuhosi Ministeriu Administrasaun Estatál (MAE), ohin, inaugura Sede Suku Manleuana, Postu Administrativu Dom Aleixo, Munisípiu Dili.
Ministru Administrasaun Estatál, Miguel Pereira de Carvalho, husu ba autoridade suku no komunidade sira tenke utiliza sede suku ne’e tuir nia funsaun hanesan suku nian no tenke kuidadu no tau matan.
“Sede suku ida-ne’e, autoridade komunitária sira utiliza tuir nia funsaun hanesan sede suku, nune’e mós ba komunidade sira tenke kuidadu no tau matan sede suku ne’e. Tanba iha suku barak mak seidauk sai hanesan ne’e no ho buat ne’ebé mak iha ona ne’e tenke kuidadu,” dehan MAE, Miguel Pereira de Carvalho, hafoin halo inaugurasaun sede suku iha Suku Manleuana, Dili, kuarta ne’e.
Miguel Pereira hateten, iha 2016 Governu deside hamenus suku Comoro rasik tanba em termus jeografia àrea ne’e luan tebes, no nesesidade populasaun mós barak entaun Governu deside Manleuana, Madohi, Bebunuk sai hanesan suku ida.
“Ohin loron, Manleuana sai hanesan suku ida no ohin bele inaugura hodi autoridade sira uza hodi atende ba komunidade sira-nia nesesidade,” nia hateten.
Nia hateten, atu garante administrasaun munisipál, postu no to’o iha suku no aldeia tuir kapasidade estadu nian, iha VIII Governu Konstitusionál mai ho nia programa rasik ne’ebé mak aprovadu iha 2018.
“Ami sira ne’ebé mak foin Xefe Estadu fó posse ne’e mai para fó kontinuidade ba programa VIII Governu Konstitusionál nian, la’ós atu halo programa foun, lae,” nia dehan.
Tuir nia, saída mak hakerek iha ne’ebá, ida-ne’e mak papél membru Governu nian tenke halo atu bele garante, nune’e implementa ho di’ak tuir kapasidade Estadu nian.
“Ohin loron, Estadu implementa medida barak para halo dezenvolvimentu iha ita-nia rain laran, komesa hosi programa dólar tolu nian, espesialmente iha suku laran hanesan Programa Dezenvolvimentu Nasionál Suku (PNDS), ne’ebé Governu aloka osan hodi suku sira identifika prioridade hanesan infraestrutura hodi halo konstrusaun ba sede suku,” nia dehan.
Nia haktuir, ida ne’e seidauk to’o entaun bainhira Governu fó osan hodi halo dezenvolvimentu maibé tenke ezije para nune’e autoridade komunitária atu bele halo investimentu iha setór ida ne’ebé mak iha retornu ekonómiku ba sidadaun sira iha suku laran.
Atividade inagurasaun ba sede suku, hetan partisipa hosi MAE ho nia komitiva, Prezidente Autoridade no Administrador Munisipál sira inklui autoridade komunitária no mós komunidade sira hosi aldeia 10.
Konstrusaun sede suku ne’e Kompania NI’MIA LOTA Unipessoal, Lda, mak toma responsabilidade no kontratu hosi 01/PDIM/AM/DILI/VIII/2019 ho montante orsamentu hamutuk $54,548,50 no durasaun konstrusaun ba Sede Suku Manleuana hahú hosi 19 agostu–novembru 2019.
Jornalista : Osória Marques
Editór : Cancio Ximenes
