DILI, 24 jullu 2020 (TATOLI)-Maski Agência TATOLI Institutu Públiku foin ejiste durante tinan haat maibé tuir Sekretáriu Estadu Komunikasaun Sosiál (SECOMS-sigla portugés) Merício Juvinal dos Reis “Akara” katak Instituisaun Estadu ne’e hahú sai ona referensia ba Mídia Nasionál no Estranjeiru.
Governante dehan TATOLI IP hatudu ninia progresu servisu ne’ebé maka di’ak tebes durante ejistensia iha TL.
“Ha’u ko’alia tanba simu informasaun katak sira iha estranjeiru akompañia notísia TATOLI halo sira kontente tanba haree nia kualidade di’ak ho informasaun ne’ebé klaru no kredivel, tanba ne’e p arabéns ba TATOLI sai nafatin referensia ba mídia sira hotu,” dehan Akara ba TATOLI, iha Palacio do Governo Dili, sesta ne’e.
Nia fó hanoin nafatin ba TATOLI hanesan mídia Estadu nian atu garante nafatin infromasaun ho kualidade, imparsialidade no kredivel iha futuru.
“Ita bo’ot sira konsege dezenvolve versaun tolu ne’ebé kapaas tebes hanesan, notísia iha lian tetun, ingles no portugés, Liliu versaun portugés ita bo’ot sira simu apresiasaun maka’as hosi konsultór língua portugés nian hato’o direita mai ha’u katak, notísia portugés ne’ebé TATOLI prodúz 85% perfeitu hela 15% mak seidauk presiza kompleta tan de’it,”dehan Akara.
Governante ne’e husu atu TATOLI tenke sai hanesan Ajénsia Notisioza ida ne’ebé ho kualidade aas hanesan nasaun seluk.
“Ita haree mundu agora ne’e, kompetisaun entre kualidade ne’e lao hela de’it. Kompetisaun iha kualidade ne’e sae makas ne’ebé TATOLI tenke hatudu nafatin kualidade,”tenik tan.
Entretantu, Agência TATOLI IP iha loron 27 fulan jullu 2020 ne’e sei kompleta ninia ejistensia durante tinan haat iha Timor-Leste.
Jornalista : Hortencio Sanchez
Editór : Agapito dos Santos
