DILI, 29 jullu 2020 (TATOLI) – Ministru Petróleu no Minerál, Victor da Conceição Soares, informa iha tempu badak nia-laran Ministériu Petróleu no Minerál (MPM) sei hato’o proposta ba Konsellu Ministru, kona-ba nomeasaun ba Prezidente Instituto Petróleo no Geologia (IPG) foun hodi troka atuál Prezidente, Hélio Casimiro Guterres tanba ninia mandatu ramata ona.
“Prezidente IPG ne’e mós nia mandatu hotu ona, tanba ne’e iha tempu besik sei iha mudansa”, dehan Ministru Victor ba Agência Tatoli iha Palásiu Governu, kuarta ne’e.
Tuir governante ne’e, kandidatu ba Prezidente IPG foun iha ona.
“Kuandu to’o ona tempu sei koñese detallu, maibé agora seidauk bele ko’alia,” nia dehan.
Ministru ne’e realsa, mandatu ba Prezidente IPG atuál ramata ona iha 24 jullu foin daudaun ne’e.
“Agora konseteza iha ona ema ho kapasidade atu troka maibé buat hotu tenke tuir regra, kompétensia abilitasaun literária, kompeténsia, inklui koñesimentu,” nia subliña.
Jornalista: Natalino Costa
Editora: Julia Chatarina