DILI, 30 jullu 2020 (TATOLI)-Vise Ministru Edukasaun Juventude no Desportu, António Guterres, hateten estudante sira iha fronteira motain Munisípiu Bobonaro fasil atu transmite surtu COVID-19 ba malu bainhira balun hetan ona moras refere.
Tanba tuir ninia observasaun nota distansia entre Timor-Leste ho Indonézia liliu Motain, Suku Batugade Munisípiu Bobonaro ho Atambua Provínsia Nusa Tenggara Timur (NTT) la dook malu tanba ne’e fasil atu transmite moras ne’e bainhira labarik sira iha Motain mai eskola iha Batugade.
“Ida ne’e mak kondisaun riil ne’ebé akontese iha postu administrativu Balibo, oinsa ita atu asegura labarik sira iha fronteira enkuantu labarik barak iha Motain mai fali eskola iha Batugade,”dehan Governante ba Diretór Jerál, Inspetór Eskolár sira iha Otél Novo Turizmu, kinta ne’e.
Bazeia ba rezultadu vizita ne’ebé maka Governante ne’e hala’o iha semana kotuk nota Governu la garante atu estudante sira seguru husi COVID-19 bainhira iha kazu foun ba transmisaun lokál nian.
“Ho kondisaun ne’e ha’u rasik informa ona ba diretór eskola no superintendente no mós Prezidente Autoridade Munisípiu Bobonaro atu haree took mekanismu di’ak saida mak atu halo hodi bele ajuda ita-nia oan sira ne’e,”tenik tan.
Ho kestaun ne’e maka fó lisaun ida ba MEJD atu re-abertura eskola sira ho koidadu atu nune’e bele halo prevensaun ba moras coronavirus.
“Ha’u husu ba ita hotu iha ne’ebé atu esforsu an maka’as hodi ajuda ita-nia oan sira ne’ebé eskola iha área remotas atu nune’e bele asegura sira husi pandemia COVID-19,”katak António.
Jornalista : Tomé Amado
Editór : Agapito dos Santos
