Austrália kompromete tulun HNGV
DILI,06 agostu 2020 (TATOLI)-Governu Austrália liuhosi ninia Embaixadór, iha Timor-Leste, Peter Roberts, informa nia parte iha nafatin vontade hodi fó apoiu tékniku, ekipamentu, formasaun rekursu umanu no seluktan ba Ospitál Nasionál Guido Valadares (HNGV-sigla portugés).
Nia hato’o kompromisu ne’e, hafoin halo vizita kortejia ida ba sala operasaun HNGV Dili kinta ne’e.
Peter hateten sei buka meius hodi fó apoiu ba HNGV hafoin moras globál coronavirus ramata.
Iha fatin hanesan Diretór Klínika Ospitál Nasionál Guido Valadares, Flávio Brandão,hateten Governu Austrália antes ne’e fó ona apoiu mákina anestezia ida ho ventiladór haat ba Sala Operasaun HNGV.
Aleinde ne’e, fó ona bolsa estudu ba médiku Timoran na’in rua hodi bá estuda iha nasaun Fiji, maibé daudaun ne’e fila ona mai Timor-Leste tanba pandemia COVID-19 maski sira-nia estudu seidauk ramata.
“Bolseiru sira husu ba Embaixadór Austrália iha Timor-Leste atu kontinua suporta sira fila ba eskola hafoin COVID-19,”dehan Flávio Brandão.
Iha ámbitu pandemia coronavirus, Governu Austrália mós fó ona apoiu hodi evakua médiku Timoroan na’in ualu husi Fiji mai Timor-Leste.
Jornalista : Hortencio Sanchez
Editór : Agapito dos Santos
