ATSABE, 06 agostu 2020 (TATOLI)-Vise Ministru Saúde, Bonifácio Maucoli dos Reis, kinta ne’e, inaugura ona Postu Saúde no uma ba doutór iha Suku Atara Postu Administrativu Atsabe Munisípiu Ermera.
Kompañia Sarakoe Unipessoál LDA maka ka’er obra ne’e ho númeru kontratu 05/PAM-KDM/X/2019 ho orsamentu $ 201,185.12. Tuir kontratu projetu ne’e implementa ho durasaun fulan-neen.
Bonifácio Maucoli dos Reis, iha ninia diskursu apela ba komunidade Suku Atara atu utiliza edifísiu ne’e ho responsabilidade nune’e bele apoiu profisionál saúde atu fó tratamentu ba pasiente sira.
”Programa Governu nian hahú husi inisiu to’o Governu Konstitusionál daualuk nian ho objetivu ida de’it mak oinsá hakbesik atendimentu ne’e ba komunidade presiza kondisaun tanba ne’e maka agora daudaun ita harii no inagura ona ne’e,” tenik Governante.
Ministériu Saúde iha tempu badak sei destaka Doutór Na’in ida, enfermeiru, parteira no Médiku ba Postu Saúde ne’ebá para bele hahú funsiona. Alende ne’e, sei kompleta mós ekipamentu no mobiliariu seluk ne’ebé presiza.
”Ha’u hakarak aproveita oportunidade ida ne’e atu husu ba komunidade sira katak hakbesik an ona mai iha fasilidade saúde tanba ita harii fasilidade saúde ne’e ba ita-nia komunidade sira ne’ebé mak presiza médiku sira nia atendimentu la’ós ita halo tiha la uza, depois animal sira mak hela fali ne’e realidade ita haree iha fatin fatin,” nia hatutan.
Partisipa iha serimonia inagurasaun ne’e maka Prezidente Autoridade Munisípiu Ermera, José Martinho dos Santos Soares, Komandante Polisia Nasionál Timor-Leste Munisípiu Ermera, Administradór Postu Administrativu Atsabe, Amu Paróku Atsabe no konvidades seluk inklui komunidade suku Atara.
Jornalista : Felicidade Ximenes
Editór : Agapito dos Santos
