DILI, 08 agostu 2020 (TATOLI)- Membru Komandu FALINTIL-Forsa Defeza Timor-Leste (F-FDTL) hamutuk na’in-450, ohin, hala’o tour FALINTIL ho motór no karreta hale’u munisípiu-12 hodi halo reflesaun ba istória luta FALINTIL nian hamutuk ho povu durante tinan-24 nia laran.
Tour FALINTIL tema “Ho Espíritu FALINTIL, Prontu no Desididu Atu Serbí Interese Povu no Nasaun” realiza hodi selebra aniversáriu FALINTIL ba dala-45 (20 agostu 1975-20 agostu 2020).
Tour FALINTIL ne’e hahú hosi Dili ba munisípiu haat hanesan, Bobonaro reprezenta FALINTIL Rejiaun IV, Manufahi reprezenta Rejiaun III, Cararas Viqueque, Baucau reprezenta Rejiaun II no Iliomar Luatem, Tutuala reprezenta Rejiaun I.
Tour FALINTIL ba da-uluk ne’e lansa husi Xefe Estadu Maiór Jenerál F-FDTL, Majór Jenerál Lere Anan Timor, akompaña husi Ministru Defeza, Filomeno da Paixão de Jesus, komandante sira partisipa direita husi Membru Komponente Navál, Komponente Apoiu Servisu (KAS), Unidade Polísia Militár, Sentru Formasaun Terrenu (CFT), Komandu Kuartél Jenerál F-FDTL no ekipa lojístika Ministériu Defeza no F-FDTL.
Tuir Ajenda durante hala’o tour ekipa sei fó apoiu ai-han báziku ba povu kbiit laek sira, inklui sosializa regra prevensaun surtu coronavirus ka COVID-19 no fó apoiu máskara ba populasaun no eskola sira.
Xefe Estadu Maiór Jenerál F-FDTL, Majór Jenerál Lere Anan Timor, hato’o parabéns ba ekipa hodi konsidera importánsia husi tour FALINTIL nu’udar reflesaun ba tour FALINTIL La’o Ain tinan 24 hodi organiza povu luta ba independénsia.
“Onra boot ita bele komemora loron FALINTIL, mezmu mosu impase polítika, maibé importante liu ita metin nafatin. Uluk imi nia maun FALINTIL sira halo Tour La’o Ain de’it hale’u Timór la iha hahán, uluk sira mós la iha regulamentu, maibé sira dixiplinadu kumpre nafatin orden, too ohin ita komemora FALINTIL nia loron hodi hanoin sira ne’ebé mate ba rai ne’e, hodi ita kontinua nafatin,” afirma Lere Anan Timor iha Kuartél Jenerál F-FDTL, Fatuhada, Dili.
Nia hatutan, mezmu ohin loron mundu tomak inklui Timor-Leste iha hela Estadu Emerjénsia, maibé Veteranu Rezisténsia tinan 24 ne’e fiar katak, rai-lulik Timor no Nai Maromak sei tulun povu husi ameasa COVID-19.
“Coronavirus ne’e iha, maibé Timor rai-lulik, ema mate rihun 300 too ona, ita labele mate tanba corona, maibé ita tenke prevene-an nafatin,” Lere alerta.
Tour FALINTIL akompaña direita husi Vise Xefe Estadu Maiór Jenerál F-FDTL, Brigadeiru Jenerál, Falur Rate Laek no komandante sira hodi fó susesu liután ba servisu F-FDTL atu kontinua serbí Estadu no povu ho profisionál.
Iha fatin hanesan, Xefe Estadu Maiór F-FDTL Koronél Calisto Santos Coli “Coliati” deklara, kada munisípiu ne’ebé ekipa vizita sei fó apoiu ai-han ba povu kbiit-laek na’in-40, fó tratamentu saúde gratuita no apoiu máskara sosializa regra COVID-19.
Ajenda tour
Tuir ajenda tour hahú ohin ekipa sai hosi Dili ba Munisípiu Bobonaro sei deskansa iha Batugade (Almosu prepara rasik), kontinua ba Postu Administrativu Bobonaro (Antigu Cavalaria Bobonaro) hodi kontinua fó apoiu ba povu kbiit-laek na’in-40 no deskansa kalan.
Iha loron 9 agostu 2020, ekipa sei sai hosi Bobonaro iha tuku 09:00 dadeer Otl, kontinua viajen hosi Bobonaro ba Suai Loro (Almosu prepara rasik) no kontinua ba Luak Don Boaventura-Manufahi hodi sosializa sensibiliza mós informasaun prevensaun ba surtu COVID-19 ba populasaun no kontinua ho asaun karidade ba povu-kbiit laek na’in-40 hodi hato’o mós mensajen FALINTIL hodi Komandu F-FDTL kona-ba destakamentu Forsa Navál iha Kosta Súl.
Iha loron 10 agostu 2020, ekipa sai husi Betano iha tuku 09:00 otl, ba diresaun Viqueque no vizita Mota Sahe, vizita fatin rezisténsia Krarás hodi hala’o enkontru ho populasaun no sensibiliza regra COVID-19 ba populasaun, fó tratamentu saúde gratuita ba povu no apoia ai-han ba povu kbiit-laek na’in-40 no fahe máskara ba estudante Eskola Báziku Filial Ular Rihik no deskansa kalan.
Iha loron 11 agostu 2020, ekipa sai husi Krarás ba diresaun Iliomar-Lautem liu Alimbata, Irabere (Almosu prepara rasik) hodi kontinua ba Iliomar no apoia ai-han ba povu kbiit-laek na’in-40.
Iha loron 12 agostu 2020, ekipa sai husi Iliomar ba diresaun Lospalos vila (Almosu prepara rasik) hodi kontinua viajen ba Asalaino, Etepipi no ba Com tasi-ibun Ualu hodi fó apoiu ba povu kbiit-laek na’in-40 no kontinua deskansa.
Iha loron 13 agostu 2020, ekipa sei sai husi Com ba Maina hodi deskansa iha Sentru Terrestre Baucau hodi almosu hamutuk kontinua viajen ba deskansa iha Ponte foun Laleia no kontinua viajen mai Kuartél Jerál Metinaro hodi fahe malu.
Vizita ne’e akompaña mós husi Unidade Polísia Marítima no Polísia Tránzitu Dili hodi akompaña ekipa nia viajen tomak bele hetan susesu.
Jornalista : Eugénio Pereira
Editór : Francisco Simões
