DILI, 09 Agustu 2020 (TATOLI)–Anin tasi be huu manas be manas. Loron nia roman be katiik sai, tiru kona ai-horis sira sai namlaek. Loromatan leno nia roman, fakar nia manas ba ema-nia leten hanesan ahi-klaak be atu sunu sala-sala ema-nia kulit.
Haree ba ai-horis sira be kuda no ema sira be la’o ba-mai iha fatin ne’e, nia tahan maran no sira-nia oin hanesan naan-isin iha fornu laran be tunu ladún tasak. Namlaek no oin naburut.
Maibé, iha fatin ida-ne’e, iha áreadores Edifisiu Agência TATOLI,I.P (institu Públiku) nian, iha inan-feton ida be hatudu nia badinas kontra loron nia manas. Maski manas, inan-feton ne’e hala’o servisu namanas hodi tesi duut ho mákina tesi-duut nian. Nu’udar feto, la natoon kaer feto nia servisu de’it maibé nia kaer hadau malu hodi dudu mákina tesi-duut nian ho mane sira be la’o hamutuk ho nia hodi tesi duut.
“Ha’u gosta kaer servisu. Servisu saida de’it ha’u hakarak koko atu halo. Agora ha’u bele kaer mákina tesi-uut nian hodi tesi duut iha areadores TATOLI nian nu’udar feto ne’ebé professional. Tanba ne’e, bainhira ita sai profisionál ona labele moe hatudu ita-nia abilidade ne’ebé maka ita iha. Tanba sai profisionál la’os serbisu tuur de’it iha edifísiu laran maka profisionál maibé hatudu lihosi saida maka ita iha no hatene,” dehan Sekretária Dirasaun Sentru Formasaun Tibar, Joaninha da Costa ba Agência TATOLI iha, Edifísiu TATOLI, Faról, Dili, sesta ne’e.
Nia liman kuana hamoos hela kosar iha nia reen-to’o no ho ibun be taka metin ho máskara, nia konfesa ba TATOLI, durante ne’e sira (sentru formasaun Tibar) sempre halo koopersaun ho instutuisaun barak inklui Agência TATOLI ne’ebé maka husu sira-nia tulun iha área hanesan halo limpeza no seluk tan, sira sempre prontu ajuda tanba liuhosi dalan ne’e bele kompleta malu.
Nu’udár feto, nia dehan, servisu iha edifísiu ruma labele garante de’it ba ema cleaner (dasa-rai) ne’ebé maka iha, tanba dasa-rai mós halo servisu iha parte balu de’it no parte balu nia seidauk bele ka presiza ema-nia ajuda.
“Nu’udár feto servisu iha instituisaun ruma labele garante de’it ba cleaner ne’ebé maka iha. Tanba, cleaner mós halo servisu iha parte balu de’it no parte balu nia seidauk bele ka presiza ita-nia ajuda. Tanba ne’e labele moe hatudu abilidade ne’ebé maka ita iha hodi bele ajuda ema seluk bainhira ema husu ita-nia tulun,” nia dehan.
Tanba ne’e, nia apela ba feto maluk sira no ba ema hotu-hotu, nu’udar feto servisu iha instituisaun ruma tenke kuidadu fatin no mós kuidadu ambiente ne’ebé maka iha edifísiu laran tanba ambiente ne’ebé moos bele inspira ema atu halo servisu ho fuan no servisu ho profesionál.
“Ko’alia liu ba ambiente Timor laran nian, nu’udár feto ha’u nia mensajen mak la presiza ema haruka ita maka halo servisu. Maibé, hosi ita-nia konsiénsia katak ita hadomi ita-nia rain, lixu tau iha nia fatin bainhira ema ruma soe lixu iha fatin arbiru presiza foti tiha no fó hanoin. Tanba, se la’os ita maka kuidadu ita-nia ambiente entaun sé tan mak atu kuidadu. Nu’udar feto servisu iha instituisaun ruma tenke kuidadu fatin no mós kuidadu ambiente ne’ebé maka iha edifísiu laran, tanba ambiente moos bele inspira ema atu halo servisu ho fuan,” nia tatoli.
Sekretária Dirasaun Sentru Formasaun Tibar, Joaninha da Costa, hateten Sentru Formasaun Tibar eziste atu hanorin no eduka joven sira oinsá atu sai profisionál iha área oin-oin.
Tuir nia katak, iha sentru formasaun profisionál Tibar durante ne’e eduka joven sira sai ema profisionál la’os de’it atu sai ema tékniku maibé ba área oin-oin ne’ebé maka bele halo mak hanesan karpintária, hotelária, kanalizasaun ho soldadura no eletrisidade. Iha área lima (5) ne’e, sira foka liubá instalasaun doméstiku no mós instalasaun ba iha área urbana sira.
Jornalista : Osória Marques
Editór : Cancio Ximenes
