DILI, 11 agostu 2020 (TATOLI)—Parlamentu Nasionál, ohin, halo votu konfirmasaun ba deklarasaun Estadu Emerjénsia (EE) ne’ebé Komisaun Permanente autoriza ona Prezidente Repúblika deklara iha loron 5 agostu 2020 liubá.
Notísia Relevante: PN autoriza PR Lú Olo dekreta tan EE
“Ohin, atu halo konfirmasaun ba deklarasaun ba Estadu Emerjénsia ne’ebé hetan ona autorizasaun hosi Parlamentu Nasionál, konfirma ou rekurta (habadak) deklarasaun Estadu Emerjénsia,” Prezidente Parlamentu Nasionál, Deputadu Aniceto Longuinhos Guterres Lopes anunsia liuhosi plenária.
Prezidente Parlamentu Nasionál fó-sai katak iha diskusaun no konfirmasaun votu ne’e sei haree nesesidade ba aplikasaun Estadu Emerjénsia refere.
Parlamentu Nasionál autoriza ona Prezidente Repúblika (PR), Francisco Guterres “Lú Olo”, dekreta Estadu Emerjénsia (EE) iha loron 5 agostu 2020 liubá maibé foin ohin mak halo votu konfirmasaun.
Komisaun Permanente Parlamentu autoriza ona Prezidente Repúblika deklara Estadu Emerjénsia hahú hosi hosi oras 00.00 iha loron 6 agostu 2020 (kinta-feira) to’o oras 23.59 iha loron 4 setembru 2020 durante loron 30 (30 dias) ba zona sira iha fronteira, aeroportu no portu.
Parlamentu Nasionál autoriza deklarasaun Estadu Emerjénsia ne’e liuhosi projetu rezolusaun númeru 58/20 kona-ba autorizasaun deklarasaun Estadu Emerjénsia ho rezultadu votasaun a-favór 20 kontra 0 no abstensaun 0.
Komisaun Permanente autoriza Prezidente Repúblika bazeia ba Konstituisaun RDTL Artigu 102 alínea g kona-ba autoriza deklarasaun estadu serku nian no estadu emerjénsia nian
Maibé, Rejimentu Parlamentu Nasionál (RPN) artigu 120 (Votasaun no forma ba autorizasaun) alínea 3 hateten autorização ne’e, bainhira fó hosi Komisaun Permanente tenke hetan konfirmasaun hosi Parlamentu iha ninia reuniaun plenária dahuluk.
Ho RPN artigu 120 ne’e mak, ohin, Parlamentu Nasionál halo votu konfirmasaun kona-ba desizaun Komisaun Permanente foti ona loron 5 agostu 2020 liubá.
Tuir observasaun Agência TATOLI iha Parlamentu Nasionál, katak Primeiru-Ministru, Taur Matan Ruak, no membru Governu sira marka ona prezensa iha plenária hodi fó justifikasaun kona-ba implementasaun Estadu Emerjénsia ne’ebé dekreta ona hosi Prezidente Repúblika.
Jornalista : Evaristo Soares Martins
Editór : Cancio Ximenes
