DILI, 12 agostu 2020 (TATOLI)-Governu liuhosi Konsellu Ministru (KM) aprova projetu Dekretu-Lei, ne’ebé aprezenta hosi Ministru Obra Públika, Salvador Soares dos Reis Pires, ne’ebé refere ba alterasaun dahuluk Dekretu-Lei númeru 8/2019, loron 24 abríl, ne’ebé aprova Estrutura Orgánika Ministériu Obra Públika (MOP).
“Projetu Dekretu-Lei halo alterasaun nesesária hodi akomoda alterasaun ne’ebé hala’o ona iha estrutura orgánika VIII Governu Konstitusionál nian,” relata Ministru Fidelis hafoin ramata reuniaun KM iha Palásiu Governu, kuarta ne’e.
Biban ne’e, ezekutivu sira aprova mós Projetu Dekretu-Lei, kona-ba alterasaun dahuluk ba Dekretu-Lei númeru 14/2019, 10 jullu, ne’ebé aprova orgánika Ministériu Interiór (MI) nian, ne’ebé aprezenta husi Primeiru-Ministru no Ministru Interiór, Taur Matan Ruak no husi Vise-Ministru Interiór, António Armindo.
Ministru Fidelis informa, alterasaun ne’e ho objetivu atu akomoda alterasaun sira ne’ebé realiza ona ba orgánika VIII Governu Konstitusionál VIII, liuliu refere ba kargu no kompeténsia sira Vise-Ministru Interiór nian.
Jornalista: Antónia Gusmão
Editora: Julia Chatarina
