DILI, 14 Maiu 2026 (TATOLI)—Tribunál Judisiál Primeira Instánsia Baukau (TJIPB), kuarta (13 Maiu) ne’e, hasai ona despaixu ba Primeira Interrogatóriu Judisiál ba arguidu na’in-10 ne’ebé envolve iha kazu omisídiu iha Aldeia Poros, Suku Mehara, Postu Administrativu Tutuala Munisípiu Lautein iha Domingu (10/5) foin lalais ne’ebé hamate Vincencio de Jesus Fernandes.
Notísia Relevante: Komandu F-FDTL sei foti medida hasoru oknum suspeitadu ba kazu omisídiu Poros
Tuir desizaun Tribunál nian deside oknum membru FALINTIL-Forsa Defeza Timor-Leste (F-FDTL) ho suspeitu na’in-rua (2) kumpre prizaun preventiva.
Ho kazu ne’e Ministeriu Públiku (MP) akuza arguidu sira ho krime omísidu argavadu ne’ebé previstu no punidu iha artigu 139 husi Kódigu Penál Timor-Leste.
Durante interrogatóriu ne’e Tribunál Judisiál Primeira Instánsia Baukau hasai despaixu hodi aplika Prizaun Preventiva ba arguidu na’in-tolu (3) inklui oknum F-FDTL ne’ebé suspetadu ba kazu omisídiu ne’e ho insiál DdSB, no arguidu na’in-lima seluk Tribunál aplika medida koasaun Termu Identidade Rezidensia enkuantu Arguidu na’in-rua seluk mós Tribunál aplika medida koasaun Aprezentasaun Periodika (AP).
Komandante ONTL Munisípiu Lautein, Superintendente Xefe Polísia António do Rego hateten, loos duni katak arguidu sira-ne’ebé mak envolve kazu Poros foin daudaun na’in-tolu (3) kumpre ona prizaun preventiva.
“Loos. Prizaun preventiva ne’e na’in-tolu (3) no na’in- lima (5) hetan TIR no na’in-rua (2) seluk Aprezentasaun Periodika,” Superintendente Xefe Polísia António do Rego hateten ba Agência TATOLI liuhusi telefónika, kinta ne’e.
Rekorda fali katak iha domingu (10/5) tuku 01h30 madrugda mosu konfrontu iha serimónia dezlutu ida iha lAdeia Poros, Suku Mehara, Postu Administrativu Tutuala, Munisipiu Lautein, ne’ebé rezulta joven ida ho naran Vincencio de Jesus Fernandes lakon vida no joven ida mós hetan kanek iha fatin akontesimentu.
Nune’e, husi kazu referida, Komandu PNTL Munisípiu Lautein detein suspeitu na’in-10 inklui oknum F-FDTL ne’ebé suspetadu envolve iha kazu referida.
Notísia Relevante: Kazu omesídiu iha Poros, PNTL detein suspeitu na’in-10
Jornalista : Hortêncio Sanchez
Editór : Cancio Ximenes
