DILI, 12 agostu 2020 (TATOLI)-Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, halo aprezentasaun ida ba Konsellu Ministru (KM) kona-ba rezultadu pagamentu no monitorizasaun ba apoiu monetáriu ne’ebé atribui ona ba uma-kain sira iha ámbitu surtu COVID-19.
Ministru Prezidénsia Konsellu Ministru, Fidelis Manuel Leite Magalhães, hateten medida ne’e ho objetivu atu hatán ba impaktu prejudisiál sira iha meiu subsisténsia família sira ho rendimentu baixu iha territóriu nasionál tanba kauza hosi COVID-19.
“Uma-kain hamutuk 305.000 hosi munisípiu 12 inklui Rejiaun Administrativa Espesiál Oé-cusse Ambeno (RAEOA) maka hetan ona pagamentu ho totál orsamentu superiór $61. Ministériu Solidaridade Sosiál no Inkluzaun (MSSI) daudaun ne’e iha ona prosesu avaliasaun ba reklamasaun sira,” tenik Ministru Fidelis hafoin ramata reuniaun KM iha Palásiu Governu, kuarta ne’e.
Governante ne’e konsidera, aprezentasaun ne’e importante tebes, ho karatér interna Governu nian, maibé entidade independente sira mós sei halo sira ninia avaliasaun ba medida implementasaun sira no daudaun iha hela prosesu.
“Sira halo sira-nia maibé Governu mós halo avaliasaun, ne’ebé hanesan MSSI halo atu haree katak implementasaun durante ne’e la’o oinsá, dezafíu iha ne’ebé, problema iha saida no solusaun saida mak hetan,” nia karesenta.
Daudaun Governu rejista reklamasaun hosi uma-kain 16.000 no MSSI mós prepara hela medida hafoin responde ba sira ne’ebé reklama.
“MSSI haree hela no tempu badak finaliza prosesu sira ne’e hotu,” nia subliña.
Jornalista: Antónia Gusmão
Editora: Julia Chatarina
