DILI, 13 agostu 2020 (TATOLI)–Diretór Ezekutivu Centro Nasionál Chega (CNC), Hugo Maria Fernandes hateten, ohin, CNC ho Fundasaun Mahein (FM) selebra (asina) nota entendimentu ida ho objetivu atu tulun-malu halo monitorizasaun ba iha instituisaun Estadu ba iha setór seguransa (PNTL) no defeza (F-FDTL).
“Ohin, Centro Nacional Chega ho Fundasaun Mahein selebra nota entendimentu ida ho objetivu atu tulun-malu hodi halo monitirizasaun ba iha ita-nia instituisaun defeza no seguransa nian. Tanba, ita hotu hatene katak mídia públika hela de’it ralatóriu ofisiál hosi Provedoria Direitu Humanu Justisa (PDHJ) kona-ba membru seguransa no defeza sira ne’ebé mak kontinua halo violasaun diretu umanu hasoru públiku ka sidadaun sira,” dehan Hugo Maria Fernandes ba jornalista sira hafoin asina nota entendementu entre CNC ho Fundasaun Mahein iha Salaun Konferénsia Antigu Komarka, Balide, Dili, kinta ne’e.
Nia hatutan, CNC no Fundasaun Mahein selebra nota entendimentu tanba entendimentu ne’e mós hodi tulun CNC tuir dekretu-lei númeru 48/2016 ne’ebé hateten atu halo monitorizasaun ba implementasaun rekomendasaun sira hosi CAVR “Chega!” no CVA ne’ebé mak balu ko’alia kona-ba oinsá mak halo reforma ba instituisaun Governu no Estadu nian iha setór seguransa no defeza nian.
Hugo esklarese, tanba haree ba pasadu tinan 24 nia-laran funu maun-alin no iha okupasaun Indonézia nian, haree forsa armada sira hanesan Polísia no Intelijénsia hosi Indonézia halo violasaun hosi parte ne’ebé de’it. Tanba ne’e, agora Timor ukun-aan ona presiza PNTL no F-FDTL tenke respeita ema-nia direitu umanu no halo atusaun tuir loloos lei no regulamentu ne’ebé maka iha.
“Ezemplu, ba haree ita-nia pasadu tinan 24 nia laran liuliu funu maun-alin ita haree forsa armada sira halo violasaun hosi parte ne’ebé de’it. Depois, iha okupasaun Indonézia nia tempu, ita hotu hatene forsa no polísia ka intelijénsia Indonézia sira komete krime violasaun oin-oin ba ema timoroan sira ne’ebé maka hakarak ukun-aan. Entaun, agora iha períodu ita ukun-aan ona ne’e, ita mós hakarak ita-nia PNTL, F-FDTL no ita-nia Intelijente sira labele halo nafatin buat ne’ebé mak uluk militár (ABRI) ka polísia Indonézia (POLRI) sira halo ne’e, maibé sira tenke respeitu ema-nia direitu umanu no halo atuasaun tuir loloos polítika, lei ho regulamentu ne’ebé maka iha,” nia esplika.
Hugo haktuir, asina nota entendimentu ne’ebé CNC no Fundasaun Mahein halo ne’e ninia durasaun la’o to’o tinan tolu no iha nia implementasaun ka atividade sira ne’ebé atu halo ne’e mak sei halo monitorizasaun loron-loron liuhosi halo konferénsia no semináriu ba membru seguransa no defeza sira.
“Iha kooperasaun ne’e, sei mai atividade oin-oin hanesan sei fó konferénsia no semináriu ba membru seguransa no defeza kona-ba direitu umanu. Iha ne’e haree liu kona-ba oinsá kona-ba étika ne’ebé di’ak halo atendimentu di’ak ba públiku, oinsá atuasun ba Polísia no intelijénsia sira iha situasaun krize nia-laran, oinsá atu halo atuasaun ne’ebé mak di’ak ba demonstrasaun sira, oinsá bele hametin kapasidade Instituisaun seguransa no defeza nian no mós bele tulun sosiedade atu hatene loloos knaar hosi ita-nia F-FDTL no PNTL ne’e mak oinsá,” nia dehan.
Maibé, Hugo Fernandes informa, CNC nu’udár instituisaun públiku entaun sei iha ámbitu prosesu elaborasaun orsamentu ba tinan oin (2021) nian, entaun entre CNC ho Fundasaum Mahein tenke tuur hamutuk atu haree atividade sira ne’ebé maka atu hala’o uluk.
Entretantu, Diretór Ezekutivu Interinu Fundasaun Mahein, João Almeida, reforsa kooperasaun entre Fundasaun Mahein no CNC ne’e importante tanba sei haree liu ba rekomendasaun CAVR “Chega!” no CVA “Per Memoriam Ad Spem”, tanba atu proteje no promove direitu umanu iha Timor-Leste.
“Iha ámbitu kooperasaun ida-ne’e, ita sei selebra kaer hodi haree liu ba rekomendasaun Chega! no CVA ninian. Tanba, atu proteje no promove direitu umanu iha Timor-Leste presiza instituisaun ida ne’ebé maka efetivu liuliu apoiu no fó aten-brani ba sosiedade sivíl atu bele halo servisu no fó sai sidadaun sira-nia lian. Tanba, dalabarak haree sosiedade sivíl ka NGO sira hato’o lian laek sira-nia lian kona-ba autoridade estadu ninian sempre halo violasaun hasoru povu,” João Almeida hateten.
Nia hateten, maneira ne’ebé sira sei uza atu halo monitorizasaun maka sira sei identifika ka simu keisa ruma hosi sidadaun sira, fasilita oinsá atu bele lori sira-nia kazu ne’e bele hetan lia-loos. Liuliu, nia dehan, meiu ne’ebé Fundasaun Mahein uza mak liuhosi Provedoria Direitu Humanu Justisa no dalaruma mós liuhosi Ministériu Públiku no direta mós ba institusaun relevante sira.
“Hanesan F-FDTL no PNTL, bainhira elementu ruma hosi instituisaun sira-ne’e viola direitu umanu, ita hato’o mós relatóriu ba sira-nia komandante atu bele haree liuliu iha asuntu sira disiplinár ninian. Agora asuntu kriminál ninian ne’e, entrega ba Ministériu Públiku ka Provedoria Direitu Humanu Justisa nia knaar,” nia dehan.
Jornalista : Osória Marques
Editór : Cancio Ximenes
