DILI, 13 agostu 2020 (TATOLI)-Jerente Nasionál empreza Santos, José Lobato Gonçalves, hateten empreza Santos planeia sei fura tán mina-matan tolu iha kampu petrolífera, Bayu-undan.
Ba inisiativa ne’e, empreza internasionál ne’e hato’o ona proposta investimentu petrolífera ba Autoridade Nasionál Petróleu no Minerál (ANPM).
“Ami sei halo investimentu hodi baku tán mina-matan tolu iha Bayu-undan. Investimentu ne’e sei presiza orsamentu millaun $200-resin no daudaun ami iha ona diskusaun ho Autoridade Nasionál Petróleu no Minerál nu’udar reguladór setór petróleu nian,” relata Jerente empreza ne’e hafoin ramata enkontru ho Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, kinta ne’e.
Notísia Relevante: ConocoPhillips Finaliza Prosesu Fa’an Ativu no Operasaun ba Santos Limited
Tuir nia, bainhira investimentu ne’e aprova hosi ANPM, maka empreza bele hanaruk tempu produsaun mina iha kampu Bayu-undan maizumenus tinan-ida tan.
Iha enkontru ho Ministru Fidelis, empreza ne’e hato’o mós planu investimentu inklui atividade ne’ebé empreza ne’e hala’o iha ámbitu pandemia COVID-19.
Nune’e mós, partilla informasaun balun relasiona ho kooperasaun ho Governu durante krize surtu.
“Antes ne’e ha’u mai hasoru ministru momentu krize ne’e seidauk komesa no momentu ne’ebá hosi parte Governu simu ami-nia sujestaun no fó atensaun kona-ba kooperasaun Bayu-undan. Entaun ami agradese ba ministru ninia kooperasaun no hato’o lalaok ne’ebé durante ne’e la’o,” nia haktuir.
Aleinde ne’e, introdúz empreza Santos nu’udar operadór foun Bayu-undan, ne’ebé sosa partisipasaun Conochophilips ne’ebé akumula porsentu 60-resin no mós sai operadór iha kampu petrolífera ne’e.
“Biban ne’e ami mós hato’o planu investimentu balun ne’ebé Santos hanoin iha relasaun ho Bayu-undan, tanba kompañia Conocophillips iha estimasaun ba produsaun Bayu-undan ninian, ho mina-matan ne’ebé iha maizumenus to’o de’it janeiru 2022. Ne’e estimasaun, maibé dalaruma bele akontese antes 2021 no bele akontese tinan 2023 liu,” nia subliña.
Iha loron 28 maiu 2020, Conocophillips finaliza ona prosesu fa’an ativu petrolífera ne’ebé lokaliza iha Norte Austrália ba Kompañia Petrolífera Australiana, Santos Limited.
Conocophillips fa’an ninia interese operasionál iha planta prosesamentu Liquefied Natural Gas (LNG) Darwin iha kampu Bayu-undan, Barossa no Poseidon ho montante biliaun $1,4.
Interese ne’ebé tama iha akizisaun ativu Conocophillips maka hanesan negósiu ne’ebé envolve iha kampu Bayu-undan, rezerva seluk inklui mós eskritóriu iha Perth, Darwin no mós iha Dili.
Durante ne’e, projetu Bayu-undan kontribui reseita ba Estadu Timor-Leste, liuliu ba fundu mina-rai hamutuk biliaun $20 resin.
Hafoin retira husi projetu Bayu-undan, Conocophillips sei konsentra ba projetu iha Australia Pacific LNG iha Queensland.
Jornalista: Antónia Gusmão
Editora: Julia Chatarina
