DILI, 13 agostu 2020 (TATOLI)-Ministériu Negósiu Estranjeiru no Kooperasaun (MNEK), kinta ne’e halo sorumutu ida ho Autoridade Seguransa no Defeza, Ministériu Defeza no Ministériu Interiór hodi diskute kona-ba planu kooperasaun iha área rua ne’e, iha Rejiaun Sudeste Aziátiku no Pasífiku.
Diretóra Jerál Asuntu ASEAN MNEK, Milena Rangel, hateten reuniaun ne’e sempre hala’o bebeik ona antes ne’e, ho naran Policy Development Suport (PDS) hodi halo identifikasaun ida ba área importante sira ne’ebé presiza hetan koordenasaun servisu ho liña ministeriál.
Entermus kooperasaun iha área defeza no seguransa, Timor-Leste estebelese ona ho nasaun sira hanesan Austrália no nasaun membru ASEAN sira hodi kapasita rekursu umanu no seluk tan.
“Ita hetan esplikasaun hosi Ministériu Defeza hamutuk ho grupu traballu defeza seguransa nian kona-ba sira nia servisu hamutuk ho Estadu membru sira no mós parseiru dialogu iha ASEAN nian,” informa Milena Rangel, ba jornalista sira iha edifísiu MNEK Praia dos Coqeiros Dili.
Notísia Relevante :Membru F-FDTL Na’in 10 Tuir Kompetisaun Tiru iha Austrália
“Ita hetan partisipasaun ida ne’ebé di’ak tebes tanba hetan reprezentasaun hosi Prezidénsia,” tenik tan.
Jornalista : Hortencio Sanchez
Editór : Agapito dos Santos
