DILI, 14 agostu 2020 (TATOLI)-Ministru Obra Públika, Salvador Eugênio Soares dos Reis Pires, informa dezeñu detalladu projetu drenajen no saneamentu iha kapitál Dili finaliza ona, tanba ne’e daudaun ho koordenasaun komisaun liña ministeriál, hahú sosialisaun ba projetu ne’e, ho apoiu finansiamentu husi Millennium Challenge Corporation (MCC) ho montante millaun $200.
“Ita iha dezeñu detalladu ona ho kustu millaun $300 no MCC sei ajuda finansia projetu ho montante millaun $200. Iha tinan oin, Timor-Leste sei simu finansiamentu husi MCC atu implementa projetu drenajen no saneamentu iha kapitál Dili,” tenik Ministru Salvador hafoin enkontru ho Primeiru-Ministru (PM), Taur Matan Ruak, iha Pálasiu Governu, sesta ne’e.
MCC no Governu Timor-Leste hala’o ona servisu iha dezenvolvimentu programa kompaktu, ho durasaun tempu tinan-lima, hodi hamenus kiak liuhosi hasa’e kreximentu ekonómiku.
Nune’e mós, Konsellu Administrasaun MCC selesiona Timor-Leste ba kompaktu MCC nian iha dezembru 2017.
Governante ne’e dehan, daudaun ne’e ekipa Timor-Leste halo ona diskusaun ho Compact Development Team MCC, ne’ebé lidera husi Embaixadór MCC, Constâncio Pinto, atu haree apoia finasiamentu.
“Ita halo esforsu atu antisipa kompaktu ne’e, nune’e bele implementa iha Timor-Leste, liuliu ba projetu drenajen no saneamentu iha kapitál Dili, ne’ebé bele implementa iha tinan oin,” nia akresenta.
Ministru refere kona-ba komunidade afetadu, ekipa hahú halo sosializasaun atu haree númeru komunidade ne’ebé hetan impaktu husi projetu ne’e atubele halo indemnizasaun ka muda ba fatin seluk hodi implementa projetu ne’e ho di’ak.
Antes ne’e, halo ona levantamentu inisiál ba projetu ne’e no identifika uma-kain 600-resin iha kapitál Dili maka afetadu no komisaun liña ministeriál sira sei halo identifikasaun tán atu halo reapropriasaun.
Komisaun liña interministeriál kompostu husi Ministériu Finansa (MF), Ministériu Justisa (MJ), Ministériu Agrikultura no Peska (MAP), Sekeretaria Estadu Protesaun Sivíl (SEPS) ne’ebé prezide husi Ministériu Obra Públika (MOP), bazeia ba despaisu husi Xefe Governu, ho númeru 034/L/7/2019 atu haree impaktu ambientál no indemnizasaun ba komunidade afetadu sira.
Estudu planu mestre saneamentu no drenajen iha kapitál Dili, hala’o husi konsultór Austrália hahú iha 2011 no 2012 no iha 2013 to’o 2017 hala’o ona melloramentu planu ba kanál.
Tinan ne’e, hanesan faze finál atu halo estudu impaktu ambientál no planu saneamentu iha kapitál Dili atu hahú konstrusaun iha tinan 2021.
Sistema drenajen no saneamentu ne’e ho intensaun atu hamenus inundasaun no kria ambiente ne’ebé saudável ba abitante tomak iha sidade Dili.
Projetu ne’e rasik, iha faze finál planu mestre no dezeñu detalladu, hala’o husi Água de Portugal (AdP) no Governu Timor-Leste halo ona kustu estimativu.
Projetu ne’e hanesan planu asaun ida atu atinje meta Planu Estratéjiku Dezenvolvimentu Nasionál (PEDN) 2011 to’o 2030, ne’ebé mensiona Timor-Leste ho populasaun ne’ebé prósperu, saudável, seguru no forte.
Jornalista: Florêncio Miranda Ximenes
Editora: Julia Chatarina
