DILI, 13 agostu 2020 (TATOLI)-Ministériu Saúde daudaun ne’e re-anúnsia vaga hamutuk 220 ba profisonál saúde sira hodi konkore para destaka ba Postu Saúde, Sentru Saúde, Ospitál Referál no Ospitál Nasionál.
Iha tinan 2019 liubá Ministériu Saúde loke ona vaga ba profisionál saúde hamutuk 320, maibé durante ezame na’in 100 maka pasa no 220 la pasa hodi adia fali ba 2020.
Diretóra Nasionál Rekursu Umanu Ministériu Saúde, Tomasia de Sousa, ba Tatoli iha ninia servisu fatin Caicoli hateten husi vaga 220, médiku jerál iha ema na’in 12, médiku espesialista na’in haat, parteira 17, enfermeiru 59, tékniku laboratóriu, famasista, nutrisionista no eletromédiku hamutuk ema na’in 128.
”Profisionál sira ne’ebé mak ita re-anunsia ne’e ita sei koloka sira ba iha Postu Saúde no Sentru Saúde inklui ospitál referál sira tanba iha Dili ita la tau ne’e so ita rekruta ba médiku espesialista sira mak ita tau iha HNGV maibé hanesan médiku jerál, parteira, enfermeira, tákniku aliadus sira ne’e ita tau hotu iha Munisípiu,” dehan tan.
Tuir polítika MS nian rekrutadu sira ne’ebé maka pasa iha vaga ne’e sei sai funsionáriu permanente, tanba ne’e durante prosesu selesaun dokumentu to’o ezame sei halo ho rigor hodi buka ema tuir ninia méritu.
Kalendariu rekrutamentu ne’ebé fó sai husi Komisaun Funsaun Públika fó sai ona iha loron 29 fulan-jullu no ramata iha loron 12 fulan-agostu.
Jornalista : Felicidade Ximenes
Editór : Agapito dos Santos
