MANATUTO, 14 agostu (2020)–Xefe Suku Leohat no Veterana, Jesuina do Rosário ‘Brani’, apela ba feto foinsa’e sira iha Timor laran tomak atu defende nafatin diretu no dignidade feto nian liuliu dignidade nu’udar feto ne’e tenke tau aas ho estuda makaas.
Tanba, nia dehan, uluk feto sira hamutuk ho mane luta-na’in sira hodi luta ba Timor-Leste nia Indpedénsia no foinsa’e tenke hadomi futuru hosi ohin ba oin.
Notísia Relevante: Diretór EBC São Bento Salau agradese ba espoza PR
“Ba feto luta libertasaun uluk ami feto hamutuk ho mane sira luta ba ita-nia indepedénsia agora ukun-an ona, ha’u husu ba feto maluk sira iha Timor laran tomak, liu-liu foin sa’e sira hakaas-aan defende nafatin diretu no dignidade feto nian liuliu dignidade ne’e tenke tau aas ho estuda makaas,” dehan Jesuina do Rosário ‘Brani’ ba jornalista sira iha ámbitu Espoza PR hala’o vizita iha rai Salau hanesan fatin Prezidente Repúblika nia subar fatin iha Suku Leohat, Postu Administrativu Soibada, Munisípiu Manatuto, sesta ne’e.
Tanba, Veterana ‘Brani’ ne’e hateten, feto foinsa’e sira tenke tenke eskola no estuda makaas no hadomi futuru hosi ohin ba oin tanba uluk feto sira hamutuk ho mane luta-na’in sira luta ba Timor-Leste nia indpedénsia ne’e hetan torturasaun no violasaun oin-oin.
Aleinde ne’e, Vetarana “Brani” lori komunidade hosi Suku Leohat tomak nia naran hato’o agradese ba Espoza Prezidente Repúblika, (PR), Cidália Nobre Mouzinho Guterres, selebra loron FALINTIL nian bele vizita no halo asaun karidade iha Prezidente Repúblika, Francisco “Lú Olo” nia subar fatin iha rai Salau iha Suku Leohat.
“Tuir ha’u nia haree no obervasaun hosi Vizita Espoza PR mai vizita ami tanba atu komemora 20 Agostu, loron FALINTIL nian. Ba ha’u, hanesan Xefe Suku, lori ha’u-nia komunidade rai Salau Suku Leohat no Manlala nia naran, ami sente orgullu no agradese tanba Espoza PR ho nia komitiva tanba ho fuan boot mai halo vizita no asaun karidade ho ami, ne’ebé hela iha rai Prezidente repúblika Francisco Guterres ‘Lú Olo’ nia subar fatin iha Salau,” Lideransa lokál ne’e hateten.
Nia hatutan, Espoza PR ho nia komitiva sira mai vizita fatin Salau tanba iha tempu defisil liuliu luta tinan 24 nia-laran, fatin ne’e sai luta-na’in Prezidente Repúblika Lú Olo nia subar fatin ne’ebé komunidade Salau liuliu veteranu no veterana sira hamatan ba luta-na’in sira loron no kalan.
Tanba ne’e, veterana “Brani” husu ba Espoza PR atu iha tempu seluk hamutuk ho Prezidente Repúblika bele vizita fila fali sira no bele deskansa kalan ida ka rua hamutuk ho komunidade sira iha fatin Salau iha Suku Leohat ne’e, para hamutuk ho komunidade sira atu vizita fila-fali fatin ne’ebé uluk sira estima ka kuidadu Prezidente Repúblika Lú Olo ne’e.
Jornalista : Osoória Marques
Editór : Cancio Ximenes
