IDN-TL sensibiliza misaun no regra prevensaun COVID-19
DILI, 17 agostu 2020 (TATOLI)- Ekipa Institutu Defeza Nasionál Timor-Leste (IDN-TL) hala’o vizita ba Eskola Primaria-11 iha munisípiu-lima (5) hodi sensibiliza misaun no vizaun servisu IDN-TL no regra saúde nian hodi halo prevensaun ba propagasaun surtu coronavirus ka COVID-19.
Notísia Relevante : IDN-TL selebra tinan-X ho programa haat no grande debate
Sensibilizasaun ne’e, hala’o husi ekipa IDN-TL iha ámbitu selebrasaun aniversáriu IDN-TL ba dala-X, ne’ebé sei hala’o iha loron 26 agostu 2020, ho nia tema “IDN no Futuru Timor-Leste”.
Eskola primária 11 ne’ebé ekipa IDN, membru Komandu Polísia Nasional Timor-Leste (PNTL), FALINTIL-Forsa Defeza Timor-Leste (F- FDTL) no Bombeiru vizita hahú husi Dili, Aileu, Ermera, Liquiça no Manatuto nian.
Programa sensibilizasaun misaun servisu no regra COVID-19 ne’e hetan partisipasaun no entuziazmu husi estudante eskola primária ho manorin na’in sira (profesór/a).
Iha vizita ne’e, ekipa sira partilla uluk Instituisaun haat (4) ne’e ida-idak nia knaar, liu-liu knaar IDN-TL bele habesik di’ak liután ba sosiedade.
Komunikadu imprensa ne’ebé Agênsia Tatoli simu husi IDN-TL, ohin, relata katak iha vizita ba Eskola Primaria Memoriál Fatunaba, Munisípiu Aileu, Xefe Departamentu Istória Militár no Protokolusaun Nasionál IDN, Kapitaun Komandu Ceufin dehan, vizita ba eskola rua iha Aileu no munisípiu sira seluk nu’udar oportunidade espesiál no importante tebes ba IDN-TL hodi nakloke ba sosiedade liuhusi atividade sosializasaun ba eskola primária Balibar ho Fatunaba hodi bele hatene saida maka IDN-TL tuir misaun servisu iha área Defeza no Seguransa Nasionál.
Ceufin hatutan, IDN-TL haree liu ba estuda ba Defeza no Seguransa Nasionál hodi sosializa atividade edukasaun sívika ba estudante sira bele hatene no koñese di’ak liután.
“Reprezenta ekipa IDN-TL mai Aileu, sente kontente tanba ho ami nia prezensa iha eskola primária rua ne’e, atrai tebes estudante no manorin na’in sira, ho entuziazmu partisipa iha atividade sosializasaun ne’e hodi akompaña estudante sira bele iha koñesimentu netik ba papél ho knaar husi instituisaun haat,” nia hateten.
Iha fatin hanesan Diretór Eskola Memorial Fatunaba, Manuel Alves da Silva sente orgullu hodi simu vizita ekipa ne’e sosializa sira nia programa servisu.
IDN-TL, harii iha agostu 2010, ho legalidade husi dekretu lei númeru 12/2010 de 26 de agostu, ne’ebé lideradu husi Kapitaun de Mar -e- Guerra, Donaciano Costa Gomes “Pedro Klamar Fuik” hahú servisu iha maiu 2012.
Diretór Eskola Primaria Kotolau, Angelino Pereira, sente kontente ho informasaun ne’ebé IDN-TL partilla bele fahe informasaun klaru ba sosiedade liu-liu estudante hodi hatene knaar IDN-TL nian.
Atividade edukasaun sívika ne’e, termina ho fahe prezente livru ho emblema IDN-TL ba estudante sira ne’ebé hatán pergunta loos, inklui entrega livru ho emblema IDN-TL ba eskola primária sira, hanesan rekordasaun taka ho hasai fotografia hamutuk.
Jornalista : Eugénio Pereira
Editór : Francisco Simões
