DILI, 17 agostu 2020 (TATOLI)–Primeiru-Ministru, Taur Matan Ruak, konvoka enkontru ho Ministru Petróleu no Minerál, Víctor da Conceição Soares, ho Prezidente Konsellu Aministrasaun Timor Gás no Petróleu, Empreza Públika (Timor GAP, Ep), António José Loiola de Sousa, hodi atualiza kona-ba serbisu petróleu.
Hafoin enkontru ne’e, Ministru Víctor, haktuir iha enkontru ohin Xefe Governu fó hanoin vizaun Governu ba indústria petróleu no hakarak empreza estatál hanesan Timor GAP la’ós ativu de’it iha upstream (tasi laran), maibé mós presiza ativu iha atividade downstream (rai-maran), liuliu ba fornesimentu mina iha sentrál elétrika Hera no Betano.
“Primeiru-Ministuru husu Timor GAP tenke halo investimentu reál iha rai-laran, ne’ebé posibilidade tenke partisipa iha downstream liuliu kona-ba fornesementu mina ba Eletricidade de Timor-Leste (EDTL) no mós planu Governu atu sentrál elétrika sira bele konverte petróleu ka gazoél ba gás hodi fornese ba sentrál elétrika sira ne’e, Timor GAP tenke hahú investe iha ne’ebá,” tenik Ministru iha Palásiu Governu, segunda ne’e.
Daudaun ne’e, empreza privadu maka fornese hela mina ba sentrál elétrika rua.
Governante ne’e konta tuir, PM Taur husu atu Timor GAP bele haree ba investimentu seluk hodi bele hatama retornu ba kofre Estadu, tanba durante ne’e Estadu investe ona maibé laiha retornu.
Nune’e mós, enkontru ohin atualiza kona-ba dezenvolvimentu sira ne’ebé relasiona ho projetu tasi mane, Greater Sunrise inklui projetu balun ne’ebé envolve Timor GAP.
“Ami atualiza projetu tasi mane ba Primeiru-Ministru. Projetu sira ne’ebé la’o agora daudaun provizoriamente pendete tanba COVID-19, iha mudansa Governu, re-estururasaun ne’ebé iha, no projetu sira ne’e sei entrega hotu iha enkuadramentu ba Ministériu Planu no Ordenamentu (MPO) atu hala’o ajustamentu,” nia subliña.
Kona-ba projetu sira tasi mane, tuir governante ne’e, daudaun Governu halo hela re-estuturasaun ba orgaun outónomu sira no kontinua konsolida institusionál atu ba oin bele foku ba investimentu projetu tasi mane.
Nia dehan, VIII Governu Konstitusionál mós iha ona MPO ne’ebé iha knaar halo enkuadramentu tanba dezenvolvimentu hotu iha territóriu nasionál ne’e sei resposabiliza husi MPO.
Jornalista: Florêncio Miranda Ximenes
Editora: Julia Chatarina
