DILI, 17 agostu 2020 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres, ohin, informa funsionamentu parlamentu nian ba Prezidente Repúblika, Francisco Guterres “Lú Olo”.
“Audiénsia ne’e ha’u mak husu hodi hato’o informasaun no relatóriu kona-ba funsionamentu no servisu parlamentu nian kuaze fulan tolu nian bainhira ha’u asume fali prezidénsia. Ami mós ko’alia perspetiva bá-oin kona-ba parlamentu nia planu no ninia prioridade sira hotu,” dehan PPN Aniceto Guterres ba jornalista sira, iha Palásiu Prezidensiál Nicolau Lobato, Bairru Pite, Dili, segunda ne’e.
Nia esplika, funsionamentu mak parlamentu hanesan órgaun lejizladór no órgaun fiskalizadór, atividade fiskalizasaun no lejislasaun mós la’o.
“Iha lei balun aprova tiha ona. Deliberasaun barak mak parlamentu halo, hanesan fó autorizasaun Estadu Emerjénsia ho lei. Servisu administrativu mós la’o, agora sei iha resesu hela. Tuir kalendáriu katak 15 setembru sei hahú fali sesaun lejislativa foun,” nia dehan
Iha opurtunidade ne’e, Prezidente Parlamentu Nasionál husu Prezidente Repúblika atu halo abertura ba lejislatura dahuluk ne’ebé sei realiza iha 15 setembru.
“Prezidente Repúblika hatán atu ba halo abertura ba terseira sesaun lejislativa iha dia 15 setembru,” dehan Aniceto Guterres.
Lei sira-ne’ebé Parlamentu Nasionál aprova mak Medida Prevensaun no Kombate Korrupsaun (MPCC-sigla portugés), Lei Protesaun Sivíl no Lei Kódigu Mineira (faze jeneralidade),
Jornalista : Evaristo Soares Martins
Editór : Cancio Ximenes
