DILI, 18 agostu 2020 (TATOLI)-Estudante Timoroan naun bolseiru iha Indonézia, iha fulan-juñu liubá simu ona subsídiu husi Governu hamutuk $ 300 relasiona ho pandemia globál COVID-19.
Estudante Teolojia semester VI husi Universidade STT SATYABHAKTI Malang Indonézia, Lamekh dos Santos, relata sira simu ona subsídiu hamutuk $ 300 ba fulan-tolu nian komesa marsu to’o juñu.
Notísia Relevante :Estudante Naun Bolseiru iha Portugal Simu Ona Subsídiu
Nia hateten ho subsídiu ne’ebé oferese ona husi Governu ne’e bele apoiu sira liliu ba sosa nesesidade bázika hanesan hahán no seluk tan durante situasaun coronavirus.
“Osan ne’ebé Governu fó ne’e tulun ona ami durante situasaun pandemia globál ne’e,” nia hateten ba Tatoli via media sosiál whatsapp, tersa ne’e.
Timoroan na’in hitu maka oras ne’e eskola iha universidade refere. Kona-ba prosesu aprendizajen, Lamekh, hateten sei estuda via online tanba haree ba kazu COVID-19 iha Indonézia sei kontinua aas.
“Ami sei hela iha seminariu no estuda via online,” katak nia.
Entretantu, Estudante Timoroan naun bolseiru hamutuk 2.000-resin maka benefisia ba programa Governu ne’e.
Notísia Relevante :Governu Aprova Millaun $ 2 Hodi fó Subsidiu ba Estudante
Jornalista : Tomé Amado
Editór : Agapito dos Santos
