iklan

NASIONÁL, HEADLINE, POLÍTIKA

MPM nomea ona Gabriel Aparício sai Prezidente IPG foun

MPM nomea ona Gabriel Aparício sai Prezidente IPG foun

Prezidente IPG, sigla portugés, Gabriel Aparício. Imajen Tatoli/Egas Cristovão

DILI, 20 agostu 2020 (TATOLI)-Governu liuhosi Ministériu Petróleu no Minerál (MPM) nomea ona Gabriel Aparício hodi troka Hélio Casimiro Guterres ba Prezidente Insituto Petróleo e Geolojia (IPG) ba mandatu tinan-haat.

Ministru Petróleu no Minirál, Víctor da Conceição, hateten nomeasaun Prezidente IPG foun tanba Prezidente sesante nia mandatu ramata ona iha 24 jullu 2020.

“Nomeasaun ba Prezidente IPG ne’e tuir lei la liuhosi Konsellu Minisitru, ne’e kompeténsia Ministru nia. Tanba ne’e, ha’u deside iha nível ministeriál de’it no la ba iha Konsellu Ministru,”  tenik Ministru Víctor, ba Agência Tatoli, bainhira partisipa iha selebrasaun aniversáriu Frente Armada Libertasaun Timor-Leste (FALINTIL) ba dala-45, iha Kuartél Jerál FALINTIL-Forsa Defeza Timor-Leste (F-FDTL), iha Fatuhada, kinta ne’e.

Notísia Relevante: PM apresia kapasidade líder foun ANPM, Timor GAP no IPG

Ministru nomea Prezidente IPG foun ho baze  ba dekretu-lei 33/2012, Estatutu IPG, kapitulu II estutura organizasaun, iha artigu da-neen ko’alia kona-ba komposisaun no noameasaun Konsellu Diretivu IPG nian.

Iha alinea dahuluk, Konsellu Diretivu IPG hamutuk ema na’in-tolu, kompostu hosi Prezidente, Vise-Prezidente ho Vogál ida, no membru Konsellu Diretivu nomea no ezonera hosi membru Governu tutela ka resposabiliza ba setór petrolífera no rekursu minerál.

“Sira nia mandatu mós hotu ona no sira asume kargu rua tutuir malu ona, tanba ne’e mak ha’u halo re-estuturasaun hosi instituisaun rua hanesan Autoridade Nasionál Petróleu no Minerál (ANPM) no Timor GAP, ha’u labele husik mós IPG, tanba ema bele dehan ha’u halo diskriminasaun,” nia akresenta.

Ho nune’e, Governante ne’e dehan tenke troka  ka nomea Prezidente foun hodi fó oportunidade ba sira seluk mós atubele aprende.

“Ha’u nomea ona Prezidente, maibé Vise ne’e ema ne’ebé servisu iha IPG kle’ur ona no Vogál na’in-ida maihosi Timor GAP. Horisehik haruka tama serbisu ona no sei kontinua mantein Prezidente antigu atubele fó apoia,” nia subliña.

Ba nomeasaun ne’e, nia garante serbisu IPG sei la’o di’ak tanba líder foun ne’e ho literasaun masteradu no iha karreira profisionál iha área peskiza no estudu.

Antes ne’e, Primeiru-Ministru, Taur Matan Ruak, konvoka reniaun ho Ministru Víctor no iha biban ne’e Ministeu aprezenta mós dirijente foun hanesan Prezidente ANPM, Florentino Soares Ferreira, Prezidente Konsellu Administrasaun Timor GAP, António José Loiola de Sousa inklui Prezidente IPG, Gabriel Aparício.

Iha enkontru ne’e, Xefe Governu apresia kapasidade profisionál lideransa foun insitituisaun tolu no fiar sira bele apoia Governu dezenvolve indústria petrolífera.

Ho esperiénsia ne’ebé líder foun sira iha, PM Taur otimista sira bele koopera ho Governu hodi foti desizaun, ne’ebé bele mellora indústria no invetimentu petrolífera iha Timor-Leste.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!