DILI, 20 agostu 2020 (TATOLI)–Sekretaria Estadu Kooperativa (SEKoop) esforsu no tau importánsia ba produtu agrikultór Shorgum ka Batar Kay Rala bele sai konsumu nasionál.
“Hosi parte SEKoop sei halo esforsu tomak atu hadi’a jestaun no kualidade serbisu tékniku, atu halo manutensaun ba mákina sira inklui promove lori produtu Shorgum sai produtu nasionál no sai konsumu nasionál hodi oferese ba merenda eskolár no seluk tán,” dehan Sekretáriu Estadu Kooperativa, Elizário Ferreira, iha espozisaun promove produtu kooperativa, iha Fundasaun Hanai Malu, Bairro Pité, kinta ne’e.
Notísia Relevante: Xanana-Governu Halo Lansamentu Nasionál ba Kolleita Sorghum Ektare 38
Asembleia Traballu MOKATIL Deskute Asuntu Importante Rua
Tuir Sekretáriu Estadu ne’e, Estadu investe ona ba polítika promosaun produtu Sorghum, tanba ne’e tenke kontinua promove.
“Estadu lakon ona osan millaun $1,4 ba de’it batar Sorghum, tanba ne’e labele husik osan ne’e monu saugati de’it. Presiza iha sustentabilidade katak produtu ne’e investe osan povu nian tenke la’o ba oin,” nia subliña.
Produtu agrikultór ne’e ofisialmente lansa ba dahuluk iha 29 outubru 2019, iha rai ektare 38 iha Suku Guiço, Postu Administrativu Maubara, Munisípiu Lquiçá.
Daudaun ne’e Batar Kay Rala kuda ona iha rai kuaze ektare 2.000 iha territóriu laran tomak.
Asembleia Traballu Nasionál hamutuk SEKoop no Movimentu Kamponez Timor-Leste (MOKATIL) atu deside produtu ne’e nia presu iha merkadu, hafoin merkadu fornese ba alimentasaun eskolár hanesan matéria prima ka hanesan produtu finál.
SEKoop apoia ona mákina prosesamentu hamutuk unidade 152 ba MOKATIL hodi halo produsaun ba Batar Kay Rala.
Jornalista: Natalino Costa
Editora: Julia Chatarina
