DILI, 21 agostu 2020 (TATOLI)-Minsitériu Obra Públika (MOP) hamutuk ho Prezidénsia Konsellu Ministru (PCM,sigla portugés) hahú diskute koodernasaun liña ministeriál ba implementasaun projetu fíziku sira.
Iha enkontru koordenasaun entre Ministru Obra Públika, Salvador Eugênio Soares dos Reis Pires, ho Ministru Prezidénsia Konsellu Ministru, Fidelis Manuel Leite Magalhães, diskute kona-ba kestaun liga ho projetu fíziku, tanba iha inisiativa reforma institusionál liuliu reforma lejizlativa sira ne’ebé mak liga ho área obra públika, ne’ebé kompeténsia ba MOP.
“Ami informa ba PCM atu konsidera iha papél kontinuasaun reforma lejizlativa, atubele akomoda kestaun ne’ebé sai hanesan lakuna ba implementasaun projetu konstrusaun fíziku, atu sai efetivu no efikaz liután iha implementasaun, tanba ne’e presiza koordenasaun interministeriál. Buat seluk tán mak impaktu ba konstrusaun obra,” tenik Mininistru Salvador, iha Palásiu Governu, sesta ne’e.
Enkontru ne’e partisipa mós hosi ekipa tékniku hosi MOP no PCM.
Antes ne’e, Governu hahú diskute mekanizmu atu halo koordenasaun no monitorizasaun ba implementasaun reforma institusionál sira.
Jornalista: Florêncio Miranda Ximenes
Editora: Julia Chatarina
