ERMERA, 21 agostu 2020 (TATOLI)-Kondisaun Eskola Básiku Filiál (EBF) Suku Railaco Kraik, Postu Administrativu Railaco, Munisípiu Ermera, dadaun ne’e ho kondisaun grave tebes tanba ne’e parte eskola husu Governu atu tau-atensaun.
“Ami halo ona proposta balun ba kestaun ne’e no ami liuhusi Diretór Eskola Ensinu Báziku Sentrál (EBC, sigla portugés) informa ona ba munisípiu maibé to’o agora seidauk iha rezultadu,” dehan Koordenadór EBF Railaco Kraik, Pedro Soares, ba Agência Tatoli, iha arredór eskola, sesta ne’e.
Totál Estudante iha EBF Railaco Kraik hamutuk 186 no totál profesór sira hamutuk na’in-neen, kompostu hosi profesór ida permanente no na’in-lima kontratadu.
Nia dehan, eskola ne’e harii ona desde tempu Indonézia iha tinan 1984 to’o agora, maibé daudaun iha sala laran kondisaun ladun di’ak no seidauk iha atensaun.
“Difulta ba estudante no profesór bainhira iha tempu udan mai no ladun seguru ba ami. Bele mós fó imajen ladi’ak mai ami iha eskola EBF Railaco Kraik,” nia akresenta.
Aleinde ne’e, aula sira la sufisiente ba estudante sira atu halo prosesu aprendizajen, tanba ne’e responsável eskola ne’e husu parte kompetente atu haree kestaun ne’e.
“Husu Governu tau-matan ba ami-nia eskola, liuliu ba kondisaun eskola,” nia fó hanoin.
Kona-ba situasaun COVID-19 ne’ebé daudaun ne’e mundu tomak enfrenta, atu implementa distansiamentu fíziku, EBF Rai Laco Kraik fahe ona estudante ba turma rua.
Eskola ne’e mós enfrenta problema bee-moos, tanba ne’e parte eskola husu Govenu tau-matan.
“Ami laiha bee-moos iha ami-nia eskola, kuandu ko’alia kona-ba saúde ijiene ne’e ita ladún kumpre, tanba ne’e husu Governu tau-matan ba ami-nia eskola, liuliu bee no saneamentu tanba durante ne’e ami hetan difuldade,” Pedro Soares subliña.
Jornalista: Natalino Costa
Editora: Julia Chatarina
