DILI, 21 agostu 2020 (TATOLI)–Governu sei aplika ho rigór lejizlasaun pra-kualifikasaun ba empreza sira hodi bele avalia kapasidade finaseiru no tékniku atu konkorre iha konkursu públiku obra Estadu nian.
“Governu tenke hahú implementa fali dekretu-lei pra-kualifikasaun atu define emprezáriu nasionál no internasionál bele kaer obra Estadu ho montante orsamentu hira, nune’e bele haforsa empreza nasionál sira ba oin,” tenik Vise Primeiru-Ministru (PM) no Ministru Planu Ordenamentu, José Maria dos Reis ba Agência Tatoli, iha ninia knaar fatin, sesta ne’e.
Tuir Vise PM, ba implementasaun dekretu-lei ne’e, nia parte fó ona orientasaun ba Konsellu Administrasaun Fundu Infraestutura (KAFI) no Komisaun Nasionál Aprovisionamentu (CNA, sigla portugés) atu halo manuál ba implementasaun projetu Estadu.
“Ha’u ko’alia ona ho KAFI no CNA rasik atubele halo manuál ida kona-ba prosedimentu atu hahú hatama rekerimentu ba projetu, implementasaun ba to’o pagamentu,” nia akresenta.
Governante ne’e esplika, manuál ne’e sei sai mata-dalan ba emprezáriu sira ne’ebé ka’er obra Estadu atu hatene prosesu implementasaun projetu sira no prioridade ba infraestutura.
Governu la simu tán ordén traballu!
Minstru Planu no Ordenamentu ne’e dehan, bainhira implementa dekretu lei ne’e ho rigór, laiha dalan atu Governu simu tán proposta ruma husi autoridade lokál inklui emprezáriu sira atu kaer obra Estadu, sein tuir mata-dalan ne’ebé iha.
“Ita haree durante ne’e, xefe suku hamutuk ho emprezáriu sira mak hatama proposta mai ministru, katak ami presiza halo ponte no estrada iha área ne’e, maibé agora Governu sei la simu tan ordén traballu, tanba prioridade ne’e Governu mak deside, la’ós bazeia ba planu no proprosta husi emprezáriu,” nia subliña.
Antes ne’e, Prezidente Kamára Komérsiu no Indústria Timor-Leste (CCI, sigla poetugés) Timor-Leste, Oscar Lima hato’o ona nia preokupasaun ba Parlamentu Nasionál no Governu kona-ba aplikasaun Lei-Aprovizionamentu no dekretu-lei pra-kualifkasaun ne’ebé komplikadu tanba defende liu direitu empreza internasionál no ignora empreza nasionál.
Nia dehan, iha pra-kualifikasaun projetu ho kustu millaun $7 ba kraik maka empreza nasionál bele implementa, enkuantu emprezáriu timor-oan iha kapasidade kaer projetu hosi millaun $15 to’o millaun $20.
Tanba ne’e, hanesan emprezáriu nia husu atu hasa’e tan valór projetu iha dekretu-lei pra-kualifikasaun atu empreza nasionál bele iha oportunidade kaer projetu boot.
Jornalista: Florêncio Miranda Ximenes
Editora: Julia Chatarina
