DILI, 24 agostu 2020 (TATOLI)-Reprezentante Organizasaun Mundiál Saúde, Rajesh Pandev, hateten programa sistema saúde família ne’e importante tanba nu’udar fundasaun baze ba prinsipiu deklarasaun saúde primária hodi atinje objetivu ida maka ema hotu tenki asesu saúde.
Nia dehan, maski programa ne’e implementa ona hahú kedas iha tinan 2015 liubá maibé populasaun barak iha área rurál maka seidauk asesu kobertura servisu saúde ho di’ak baseia ba prinsipiu deklarasaun Alma-Ata katak koidadu saúde primária maka xave atu atinje objetivu ba ema hotu.
Sistema saúde iha família sei hadi’a asesu no fasilita detesaun sedu liuhosi pakote kompreensivu servisu ba koidadu saúde primária ba nivel uma-kain liuhosi vizita domisiliáriu, konsulta klíniku, tratamentu no referál.
Notísia Relevante : MS re-ativa sistema saúde iha família
Programa ne’e parte ida husi Objetivu Dezenvolvimentu Sustentavel hodi la husik ema ida iha kotuk intermus asesu ba servisu saúde.
Iha tinan 2017, ekipa médiku sira vizita ona uma-kain besik 94% iha territóriu TL no rejistu ona ho detaillamente populasaun 84% hodi fó tratamentu saúde.
”Programa saúde na família, konstitui pasu importante iha Timor-Leste nia esforsu hodi atinjie kuidadu saúde universál liuhosi Kobertura saúde universál ne’ebé mai ho vizaun ida kuidadu saúde primária ne’ebé hakerek ona iha deklarasaun Alma-Ata iha tinan 1978,” dehan Rajesh Pandev, iha ninia diskursu durante serimonia re-abertura sistema saúde iha família iha Otél Novo Turizmu Dili, ohin.
Nia promete Organizasaun Mundiál Saúde sei kontinua fó apoiu tékniku no programátiku ba programa sistema saúde iha família iha futuru.
Tuir nia ho implementasaun programa ne’e bele hadi’a di’ak liután prestasaun saúde ba komunidade hodi kombate moras sira hanesan tubercoluse (TB) no HIV-SIDA, moras trópiku abandonadu no seluk tan.
Jornalista : Felicidade Ximenes
Editór : Agapito dos Santos
