DILI, 24 agostu 2020 (TATOLI)-Diretór Ezekutivu Servisu Rejistu Verifikasaun Emprezariál (SERVE), Florêncio Sanches, hateten iha tempu badak nia sei konvoka enkontru ho ekipa hodi avalia sistema atendimentu foun liuhosi email.
Hahú loron 10 agostu 2020, SERVE simu ona pedidu liuhosi email ba prosesu pre-verifikasaun, atu asegura no kontribui ba realizasaun polítika Governu hodi hasa’e kualidade no prestasaun servisu ba atendimentu ba públiku no elimina kustu no tempu.
“Ha’u tau ona planu katak sesta agora ami sei tuur hamutuk hodi halo avaliasaun ba sistema foun liuhosi email, karik la’o di’ak bele kontinua maibé ladi’ak karik presiza haree hamutuk parte ne’ebé maka ladi’ak, nune’e bele hadi’a sistema tanba buat hotu ita halo atu apoiu setór privadu hodi bele halo atividade ekonomia,” dehan Diretór Ezekutivu SERVE iha salaun Institutu Apoiu Dezenvolvimentu Emprezariál (IADE), Bebora, segunda ne’e.
Notísia Relevante: Emprezáriu timor-oan preokupa atendimentu lisensa negósiu
Tuir Dirijente ne’e, sistema atendimentu liuhosi email ho objetivu atu hafasil emprezáriu sira iha rejistu verifikasaun emprezariál ho di’ak liu.
“Ami muda servisu atendimentu públiku iha SERVE. Ami aplika daudaun ne’e, aplikante sira bele submete dokumentu liuhusi email, katak ita ema ho ema la hasoru malu ona, hafoin ekipa boot iha SERVE laran maka sei halo verifikasaun,” nia esplika.
Nia hatutan, bainhira verifikasaun konklui ona maka haruka filafali ba nain atu mai foti.
“Importante atu asegura polítiku Governu nian kona-ba atendimentu públiku, atende ema seluk ho di’ak atu sira bele dezenvolve ita-nia ekonómia,” nia subliña.
Prosesu ne’e sei hahú faze dahuluk, halo prosesu pre-verifikasaun ba naran komersiál atu partisipa iha negósiu no empreza sira sei tuir regra no prosedimentu aplikável.
Daruak, bainhira pre-verifikasaun loos ona, SERVE sei informa fali ninia rezultadu, datoluk, aplikante sira presiza prepara dokumentu sira hanesan estatutu no konstitutivu sira, inklui dokumentu seluk hanesan akta deliberasaun, deklarasaun ruma no dokumentu seluk atubele submete hikas tuir email.
Ikus liu, SERVE sei halo prosesamentu ba aplikante nia dokumentu tuir pedidu ka nesesidade sira.
Prosesu pre-verifikasaun aplikável ba prosesu sira hanesan rejistu foun, alterasaun, renovasaun, taka empreza ka kompañia, disolusaun, elimina, suspende ezersísiu ka hala’o atividade ekonómika sira.
Antes ne’e, emprezáriu timor-oan preokupa ho atendimentu SERVE tanba bainhira trata dokumentu lisensa ba negósiu bele lori tempu.
Jornalista: Natalino Costa
Editora: Julia Chatarina
