DILI, 25 agostu 2020 (TATOLI)-Governu liuhosi Ministériu Saúde, tersa ne’e distribui ona ambulánsia hamutuk unidade 16 ba Munisípiu 12 inklui Rejiaun Administrativa Espesiál Oé-Cusse Ambeno (RAEOA).
Husi Ambulánsia 16 ne’e, Munisípiu Baucau, Lautem no Ermera hetan ambulánsia hamutuk neen tanba kada munisípiu ida simu rua. Enkuantu Munisípiu sia seluk no RAEOA hetan Ambulánsia ida.
Notísia Relevante :MS seidauk finaliza prosesu inspesaun ba ambulánsia 16
”Munisípiu ne’ebé mak hetan ida ita sei aumenta tan liuhusi apoiu ne’ebé mak ami halo ona pedidu ba Embaixadór Japaun iha Timor-Leste atu apoiu tan ita ho ambulansia 22 entaun ita bele aumenta tan ba Munisípiu ne’ebé mak hetan ida idak,” informa Ministra Saúde, Odete Maria Freitas Belo, iha Palasiu Sinzas, Caicoli.
Iha fatin hanesan Vise Ministru Saúde, Bonifácio Maucoli dos Reis, hateten Governu sosa ambulánsia hirak ne’e ho osan husi verba COVID-19 ho montante rihun $ 877 no sosa husi Nasaun Tailándia.
Kompaña Timor Safari Unip.LDA maka manán tenderizasaun hodi importa ambulánsia 16 mai Timor-Leste.
Notísia Relevante :Ambulánsia 16 to’o iha Timor-Leste
Jornalista : Felicidade Ximenes
Editór : Agapito dos Santos
