DILI, 25 agostu 2020 (TATOLI)-Prezidente Instituto Petróleu e Geologia (IPG) sesante, Hélio Casimiro Guterres, ofisialmente entrega ona podér ba Prezidente IPG foun, Gabriel Gaspar Aparício de Oliveira.
Hélio Casimiro hato’o agradesimentu ba konfiansa Governu ne’ebé fó ba nia durante períodu rua ho durasaun tinan ualu.
“Ha’u hato’o agradese wain ba konfiansa no oportunidade ne’ebé mak fó mai ha’u durante tinan-ualu nia-laran, desde mandatu V Governu to’o ohin loron ha’u-nia mandatu hotu,” tenik Hélio Casimiro, hafoin entrega serbisu ba líder foun, iha salaun IPG, Delta, tersa ne’e.
Prezidente sesante nia mandatu ramata ona iha 24 jullu 2020 no Ministru Petróleu no Minirál, Víctor da Conceição, halo nomeasaun ba Prezidente IPG foun.
Nia kompromete sei nafatin apoia serbisu atuál Prezidente hodi dezenvolve IPG no serbisu relevante seluk.
“Ba futuru, ha’u nia pozisaun iha IPG maka ha’u sei fó apoiu, ha’u jeólogu, iha domin boot, no iha koñesementu ba área ne’e, tanba ne’e ha’u hakarak partilla ho instituisaun ne’e inklui mós iha esperiénsia jestaun administrativa ne’ebé durante ne’e ha’u hetan,” Hélio promete.
Nia haktuir, durante mandatu foku ba risku jeolójiku tanba daudaun ne’e konstrusaun hahú barak iha fatin-fatin, liuliu iha sidade Dili rasik.
“Durante mandatu ami-nia foku ba risku jeolójiku, tanba ita-nia konstrusaun hahú la’o barak ona no ita-nia kresimentu populasionál sa’e maka’as tebes, haree ba Dili laran de’it iha foho lolon sira ne’e hahú ema okupa ona. Entaun ami hahú hanoin liu ba risku tanba iha tinan 2019 IPG hola rasik seismografia atu hatene ita-nia rai nakdoko,” nia esplika.
Tuir nia, rai sira halai ne’e nia efeitu hanesan mós rai nakdoko no ita la nota, maibé ekipamentu sira rejistu hela to’o udan tau ekipamentu ne’e bele nakloke.
“Entaun nia monu iha fatin balun no ida ne’e mós afeta to’o iha inundasaun tanba monu mai taka tiha bee-dalan,” nia akresenta.
Aleinde ne’e, foku mós ba movimentu ne’ebé hatudu rai bele bok-an hela.
“Entaun monta planta GPS permanente ne’ebé maka ikus mai IPG harii sentru informasaun tempu reál ba iha kualkér rai nakdoko, iha Timór no mós iha rejiaun inklui mundu nian. Ita iha sentru informasaun di’ak ona ne’ebé bele suporta ita-nia serbisu publiku no mós ita-nia konstrusaun ne’ebé maka iha,” nia subliña.
Jornalista: Antónia Gusmão
Editora: Julia Chatarina
