DILI, 26 agostu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, hateten estudante Universidade Nasionál Timor Lorosa’e (UNTL) obrigatóriu selu propinas ho valór $ 5.00 kada fulan to’o dezembru 2020.
“Ida ne’e mak desizaun Governu nian liuhusi Ministériu Ensinu Superiór Siénsia no Kultura hatun ona ba UNTL atu jere modalidade ne’e,” dehan Longuinhos hodi hatán ba ejizénsia estudante UNTL balun ne’ebé seidauk selu propinas ba universidade.
Notísia Relevante :UNTL aplika propinas $ 5.00 ba estudante
Antes ne’e, MESSK propoin ona modalidade rua ba UNTL atu eskoilla, dahuluk maka estudante sira tenki selu $ 5.00 kada fulan to’o dezembru 2020, no modalidade ida seluk maka estudante sira sei selu hafoin graduasaun.
“Polítika MESSK nian atu hakman estudante sira kada fulan bele selu tuir sira-nia kbi’it to’o dezembru kompleta $ 30.00,” tenik Governante ba jornalista sira iha Palacio do Governo Dili, kuarta ne’e.
Entretantu, durante ne’e estudante universitáriu ne’ebé hamahan aan iha Aliansa Universitáriu Timor-Leste (AUTL), ejize beibeik ba Governu liuhosi MESSK atu fó subsídiu no aplikasaun propinas gratuita ba sira hanesan ho estudante naun bolseiru iha rai-liur tanba enfrenta situasaun hanesan COVID-19.
Notísia Relevante :AUTL ejize Governu kria fali dekretu-lei foun
Jornalista : Tomé Amado
Editór : Agapito dos Santos
