DILI, 26 agostu 2020 (TATOLI)-Governu liuhosi reuniaun Konsellu Ministru (KM) aprova ona proposta tetu Orsamentu Jerál Estadu (OJE) 2020 ho montante biliaun $1,497, ne’ebé aprezenta hosi Vise-Ministra Finansa, Sara Lobo Brites.
Antes ne’e, iha loron 29 juñu, KM estraordinária aprova tetu OJE ba tinan fiskál 2020 ho valór hamutuk millaun $1.492,3, maibé tanba iha ajustamentu maka montante ne’e sa’e oituan ho aumentu millaun $1,49.
“Konsellu Ministru aprova projetu proposta lei Orsamentu Jerál Estadu tinan 2020 ho montante totál biliaun $1,497 atu kobre nesesidade ba programa no prioridade nasionál ne’ebé VIII Governu Konstitusionál define ona, liuliu iha nível estabilizasaun setór sosiál no ekonómiku, inklui prosesu reforma institusionál hirak ne’ebé hala’o daudaun,” tenik Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun KM, iha Palásiu Governu, kuarta ne’e.
Notísia Relevante: Governu Dada Proposta OJE 2020 Husi PN
Tuir governante ne’e, dokumentu ne’e sei inklui despeza sira ba resposta COVID-19 no medida sira kona-ba rekuperasaun ekonómika.
Enkuantu membru Governu sira halo debate ba ajustamentu hirak ne’ebé presiza, ba kalendáriu preparasaun OJE 2020 no 2021, atu nune’e bele submete orsamentu 2020 ba Parlamentu Nasionál (PN) iha 15 setembru no orsamentu 2021 iha 15 outubru.
Tetu OJE 2020 ho montante biliaun $1,497, fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4.
Tuir Vise-Ministra Sara Lobo, totál OJE 2020 finansiadu hosi reseita doméstika, ho levantamentu hosi Rendimentu Sustentável Estimadu (RSE), saldo tezouru no empréstimu.
“Entaun hosi reseita doméstika ita projeta millaun $172,3, hosi RSE millaun $544,3, ne’e duni totál millaun $316,6 maibé tanba osan la to’o (défise) entaun ita foti exesu hosi fundu mina-rai millaun $477 liu RSE. Entaun totál levantamentu hosi fundu mina-rai biliaun $1,011.3.
Governu sei aprezenta Proposta OJE 2020 ba datoluk
Bainhira Governu aprezenta Proposta OJE 2020, maka aprezentasaun ne’e ba datoluk ona tanba antes ne’e Governu aprezenta ona maibé la pasa.
Iha loron 15 outubru, Governu liuhosi Vise-Finansa Sara Lobo hamutuk ho Ministru Fidelis submete Proposta Lei OJE 2020 ba Parlamentu .
Proposta dahuluk ne’ebé Governu submete ho montante biliaun $1,950 (inklui impréstimu $73), bainhira esklui impréstimu hamutuk biliaun $1,887, no bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.
Maski nune’e, iha loron 3 dezembru 2019, Primeiru-Ministru, Taur Matan Ruak, retira Proposta OJE 2020 husi PN tanba rona opiniaun no preokupasaun husi deputadu sira ne’ebé konsidera montante boot liu no kontra Lei Jestaun Finanseira.
Nune’e, Governu lori hikas proposta ba daruak hodi diskute maibé iha 17 janeiru 2020, Proposta OJE 2020 la pasa iha diskusaun jeneralidade ho rezultadu votasaun a-favór 13, kontra 15 no abstensaun 25.
Proposta foun OJE 2020 ne’ebé la pasa ho montante biliaun $1,668, kompostu hosi sálariu no vensimentu millaun $235,6, bens no servisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.
Jornalista: Antónia Gusmão
Editora: Julia Chatarina
