DILI, 26 agostu 2020 (TATOLI)-Prezidente Agência Tatoli, José da Costa, agradese ba Sekretáriu Estadu Komunikasaun Sosiál, Merício Juvinal dos Reis ‘Akara’, tanba bele depozita ona konfiansa tomak ba nia hodi lidera mídia estatál ne’e, maski la to’o rohan tanba nia deside rezigna-an molok kompleta mandatu tinan-haat.
“Ha’u hakarak agradese ba konfiasa Señor Sekretáriu Estadu Komunikasaun Sosiál kuaze tinan-rua nia-laran antes ba Señor Ministru MAPKOMS,” tenik José da Costa, iha seremónia despedida iha salaun Borja da Costa, Agência Tatoli, Farol, kuarta ne’e.
Nia mós agradese ba Ministru Asuntu Parlamentu Komunikasaun Sosiál, Francisco Jerónimo, ba konfiansa ne’ebé fó iha fulan hirak nia-laran to’o momentu ikus.
“Ami nian-rua (MAPKOMS) sei ko’alia ha’u dehan karik di’ak liu ha’u sai, antes tarde tuir prosesu. Ha’u hatama karta rezignasaun, ha’u dehan ita tenke trata sasán sira ho profisionál, ita hakarak retratu ne’ebé di’ak, tanba ne’e hahú hosi fulan-ida nia-laran atu prosesu ne’e bele la’o ho di’ak,” nia haktuir.
Líder Agência Tatoli ne’e mós agradese ba apoiu no kooperasaun Concelho de Imprensa (CI) no Rádiu Televizaun Timor-Leste, Empreza Públika (RTTL,EP).
Nia mós kompromete ba oin nia sempre nakloke ba mídia estatál ne’e.
“Konta ho ha’u nafatin ho ita bo’ot sira, saida maka ha’u bele apoiu no bele kontribui, ha’u halo,” nia dehan.
Nia husu ba líder foun Agência Tatoli atubele nafatin garante independénsia durante hala’o knaar.
“Sé de’it maka lidera Tatoli, tenke buka forma hotu atu garante nafatin independénsia Tatoli nian no hambrik hanesan Ajente Estadu. Agora buka halo di’ak liután atu labele iha intervensaun no laiha buat ida hosi kotuk ne’ebé bele halo sai probnlema,” nia apela.
Nia louva ekipa Tatoli ne’ebé durante iha tanba kontinua hatudu sólidu nafatin no sempre halo diskusaun nakloke atu buka solusaun hamutuk, tanba durante ne’e seidauk iha problema boot iha internál.
“Ha’u louva ekipa Tatoli, imi sólidu to’o agora, to’o minitu ida ne’e ha’u seidauk rona hosi ekipa ne’e iha hanoin sira ne’ebé la konkorda malu tanba sempre buka halo diskusaun hodi solusiona kestaun ruma, ne’e mak daudaun akontese iha Tatoli,” nia subliña.
Tanba ne’e, nia husu ba líder foun Agência Tatoli tenke kumpre kultura ne’e atubele dezenvolve di’ak liu ekipa ne’e ba oin.
“Lidera ema la fásil, dezenvolve ekipa la fásil no mobiliza ekipa la fásil, enkuantu laiha sólidu iha ekipa ida,” nia fó hanoin.
Iha biban hanesan, Diretora Produsaun no Informasaun Agência Tatoli, Rita Almeida, hateten dinámika polítika no situasaun inserta sira mosu, obriga tenke abitua no adapta iha situasaun sira ne’e.
“Ida ne’e sempre mosu iha instituisaun ida. Ha’u husu ba ekipa Tatoli tomak, jornalista sira nafatin kontinua sai parseiru di’ak ba públiku tomak ne’ebé durante ne’e tau-matan ba ita. Ita tenke kontinua komunga prinsípiu jornalizmu profisionál, ida-ne’e maka importante liu ba ita,” nia fó hanoin.
Nia dehan, iha instituisaun mídia Estadu, líder sira bele troka maibé serbisu hanesan jornalista tenke la’o nafatin tanba profisaun jornalista ne’e profisionál.
Diretora ne’e mós apresia Ministériu Asuntu Parlamentár no Komunikasaun Sosiál (MAPKOMS) no Sekretaria Estadu Komunikasaun Sosiál (SEKOMS) tanba durante ne’e tau-matan ba Tatoli, tanba ne’e nia husu ekipa Tatoli atu idaidak bele iha responsablidade kontribui ba Estadu.
“Ita nafatin kaer prinsípiu ida atu tane institusaun Estadu ida-ne’e, tanba Estadu gasta ona osan barak atu harii institusaun ida, tanba ne’e ita presiza proteje instituisaun Tatoli,” Diretora ne’e subliña.
Nia mós husu ba Prezidente José da Costa, maski la hamutuk ona ho Tatoli maibé nafatin sai Embaixadór Tatoli iha li’ur hodi kontinua promove Tatoli ba ema hotu.
José da Costa nomeadu nu’udar Prezidente Konsellu Diretivu Agência Noticiosa de Timor-Leste-Tatoli ba mandatu tinan-haat liuhosi desizaun Konsellu Ministru iha loron 5 dezembru 2018, hafoin simu pose iha 21 dezembru 2018 no hala’o serbisu loloos iha inísiu janeiru 2019 to’o agora.
Proposta nomeasaun ne’e aprezenta hosi Sekretáriu Estadu Komunikasaun Sosiál, Merício Juvinal dos Reis ‘Akara’, tanba antes ne’e Agência Tatoli tutela ba SEKOMS, maibé ho mudansa orgánika VIII Governu, mídia Estadu ne’e agora tutela fali ba MAPKOMS.
Prezidente dahuluk Agência Tatoli ne’e hatama karta resignasaun iha loron 03 agostu no sei husik kargu ne’e iha 31 agostu 2020.
Jornalista : Natalino Costa
Editora: Julia Chatarina
