HATULIA, 28 agostu 2020 (TATOLI)-Ministériu Saúde hamutuk ho Doutór Espesialista Kuba no Timoroan, iha kinta ne’e halo ona konsulta masal ba pasiente 600-resin iha Sentru Saúde Cavo Martinho da Silva Guisarudu Hatulia B Munisípiu Ermera.
Husi pasiente 600-resin ne’e, pasiente 400-resin rejista sofre moras infesaun vias respiratóriu ka ISPA no restu hanesan isin manas baibain, tensaun no seluk tan.
Notísia Relevante :MS inagura Sentru Saúde Hatulia B
Diretór Saúde Ermera, António de Deus, hateten kazu ISPA aas liu iha Sentru Saúde Hatulia B tanba akontese mudansa klimátika ne’ebé tama ona tempu bailoron hodi provoka rai-rahun.
“Ha’u konsidera pasiente iha Sentru Hatulia B ne’ebé afeta Ispa ne’e tanba impaktu husi ambiente, agora daudaun akontese hela reabilitasaun estrada iha Munisípiu Ermera nian,” informa nia ba Tatoli iha Hatulia, sesta ne’e.
Iha fatin hanesan Vise Ministru Saúde, Bonifácio Maucoli dos Reis, hateten Ministériu Saúde maka husu apoiu ba Doutór Espesialista Kuba no Timoroan atu fó tratamentu saúde ba populasaun iha fatin refere.
“Ita maluk doutor espeisalista sira ne’e ho espeisalista hanesan medisina interna, jenikolojíku ostestíka, oktamolojia, no karolojia sira mai kompletu hodi fo atendementu saúde ba populasaun sira ne’e,” katak Maucoli.
Sentru Saúde Hatulia B halo atendimentu ba populasaun husi suku lima hanesan Fatubessi, Asulau, Urahou, Fatubolu no Mau-ubu.
Notísia Relevante :Ispa-diaréa rejista maka’as iha Hatulia
Jornalista : Tomé Amado
Editór : Agapito dos Santos
