DILI, 01 setembru 2020 (TATOLI)-Ministru Asuntu Parlamentár no Komunikasaun Sosiál (MAPKOMS), Francisco Jerónimo, liuhosi despaisu nomea atuál Vise-Prezidente Asuntu Mídia no Jornalístiku, Manuel Pinto, ba Prezidente Agência Tatoli interinu hodi troka Prezidente sesante, José da Costa.
Iha intervensaun, Ministru Francisco, hateten nomeasaun interinu ne’e atu fó tempu ba MAPKOMS haree Prezidente Tatoli permanente.
“Ami-nia prezensa atu kumpre liafuan ne’ebé antes hato’o ona, ohin entrega despaisu atu nomea Prezidente Agência Tatoli interinu hodi kontinua serbisu Prezidente sesante. Iha Vise-Prezidente na’in-rua maibé ami foti desizaun Señor Manuel Pinto sei halo knaar hanesan Vise no foti desizaun hanesan Prezidente interinu,” tenik Ministru iha ámbitu entrega serbisu hosi Prezidente sesante ba Prezidente interinu, iha salaun Borja da Costa, edifísiu Agência Tatoli, Farol, tersa ne’e.
Notísia Relevante: MAPKOMS simu karta rezignasaun Prezidente Agência Tatoli,IP
Tuir governante ne’e, maski iha preokupasaun barak kona-ba líder foun, maibé to’o tempu sei iha líder difinitiva ida.
“Ha’u hatene ita bo’ot sira preokupa atu prienxe vaga no preokupa oinsá atu foti desizaun, maibé fó tempu ba ha’u atu halo serbisu ho di’ak no ita fó prioridade ba buat ne’ebé lalais. Líder foun ne’e la’ós la prioridade maibé ho dotasaun orsamentu temporáriu ne’e difísil,” nia dehan.
Governante ne’e husu ekipa Tatoli atu koopera ho Prezidente interinu hodi hala’o serbisu ho di’ak no dudu prosesu la’o ba oin.
“Ha’u espera ita bo’ot sira bele serbisu ho di’ak hamutuk ho Señor Manuel Pinto. Mudansa ne’ebé mosu iha Tatoli la’ós foin maka akontese maibé mosu dala barak iha instituisaun Estadu sira, tanba ne’e husu ba ekipa sira kontinua profisionaliza-an atu hala’o knaar,” nia subliña.
Ministru husu ba Prezidente sesante atu kontinua kontribui hanoin sira hodi dezenvolve Agência Tatoli ba oin, maski hala’o ona knaar foun iha instituisaun seluk.
Prezidente interinu hakarak konsentra ba kestaun tolu
Iha biban hanesan, Prezidente Agência Tatoli interinu, Manuel Pinto, kompromete sei kontinua planu no programa ne’ebé iha ona.
“Iha tempu badak ne’e, ha’u-nia mandatu hakarak kontribui iha faze atu halo Tatoli sai forte ne’ebé haktuir ona iha planu no programa, konsentra nafatin iha kestaun tolu hanesan dezenvolvimentu institusionál, espansaun kontiúdu no parseria. Asuntu tolu ne’e sai baze atu moderniza Tatoli tuir meta ne’ebé Konsellu Diretivu halo ona,” tenik Prezidente interinu.
Nia konsidera nomeasaun ne’e atu asegura funsionamentu jestaun internál no esternál Tatoli no asegura reprezentasaun Tatoli iha elaborasaun orsamentu tinan 2020 no 2021 ne’ebé tempu badak sei aprezenta ba Parlamentu Nasionál.
Prezidente interinu ne’e otimizta katak instituisaun Estadu ne’e sei modernu tanba iha forsa serbisu ekipa.
“Matenek oituan ka barak ami sempre tau hamutuk. Diferénsia líder ka kargu la sai satán ba ami iha jornada to’o ohin loron tanba baze ne’ebé ami hahú maka serbisu ekipa, ne’e kapitál úniku no iha esperansa Tatoli sei ba oin ba kualkér líder ne’ebé sei mai,” nia subliña.
Manuel Pinto mós agradese ba konfiansa MAPKOMS ne’ebé fó ba nia.
“Ha’u agradese MAPKOMS tanba konsege fó resposta ba dúvida no prosesu kaderizasaun iha Tatoli. Desizaun ne’e maski seidauk definitivu maibé fó espasu atu hamutuk halo serbisu asegura funsionamentu dezenvolvimentu Tatoli tuir saida maka estatutu haktuir,” nia realsa.
Nia mós agradese ba Prezidente sesante no Vise-Prezidente Asuntu Administrasaun no Finansa, Olandino da Costa, tanba durante kuaze tinan rua iha Konsellu Diretivu konsege identifika dalan atu lori Tatoli ba oin liuhosi planu no programa sira.
Manuel Pinto hola parte hanesan jornalista dahuluk na’in-hitu, desde ajénsia ofisiál Estadu Timor-Leste ne’e lansa hanesan embriaun iha loron 27 jullu 2016.
Iha loron 5 dezembru 2018, José da Costa nomeadu nu’udar Prezidente Konsellu Diretivu Ajénsia Notisioza Timor-Leste, Tatoli ba mandatu tinan-haat liuhosi desizaun Konsellu Ministru no liuhosi diploma ministeriál Sekretaria Estadu Komunikasaun Sosiál (SEKOMS) nomea Vise-Prezidente Manuel Pinto no Olandino da Costa.
José da Costa simu pose iha 21 dezembru 2018, hahú knaar iha inísiu janeiru 2019.
Prezidente sesante submete karta rezignasaun ba MAPKOMS iha loron 03 agostu no husik kargu ne’e iha loron 31 agostu.
Jornalista: Natalino Costa
Editora: Julia Chatarina
