DILI, 01 setembru 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, tersa ne’e ofisialmente re-integra bolseiru Timoroan na’in 26 ba Ministru Agrikultura no Peska (MAP) Pedro dos Reis hodi halo estájiu profesionál.
Bolseiru na’in 26, na’in ida hanesan funsionáriu públiku no restu hanesan estudante, sira ne’e estuda iha Indonézia ho grau lisensiatura (S1) no baxarelatu iha área teknolojia, rekursu marina, teknolojia peska no seluk tan.
Husi bolseiru na’in 26 estuda iha universidade iha Jakarta hamutuk na’in haat, Surabaya na’in lima Sulawesi na’in lima no seluk tan.
“Ohin ita hotu haree no asiste ita nian alin na’in 26, sira mak ita-nia rekursu humanu, ita-nia riku soin no ita-nia patrimoniu ba dezenvolvimentu nasionál nian,” informa Ministru Longuinhos dos Santos, iha salaun MAP Comoro Dili.
Ho estájiu profesionál ne’e bele hasa’e no dezenvolve abilidade estudante bolseiru sira iha setór agrikultura.
“Ha’u husu atu asegura nafatin imi-nia komportamentu ne’ebé diak tanba imi mak sai pilár importante ba dezenvolvimento nasional nian,” nia dehan.
Hahú husi 2014, MESSK liuhusi fundu dezenvolvimentu kapitál umanu oferese ona bolsa estudu ba Timoroan hodi estuda iha área teknolojia, rekursu marina, teknolojia peska no seluk tan hamutuk ema na’in 37, feto na’in 18 no mane na’in sia. No ema na’in 10 maka daudaun ne’e sei estuda hela iha Indonézia.
Iha fatin hanesan Ministru Agrikultura no Peska (MAP) Pedro dos Reis, husu ba estajiáriu sira atu aproveita oportunidade ne’e hodi ezerse sira-nia matenek durante aprende iha universidade.
“Ha’u hakarak nafatin enkoraja estudante bolseiru sira katak sira ne’ebé mak funsionáriu mai kontinua nafatin imi-nia servisu no sira ne’ebé mak la’ós funsionáriu bele hala’o imi-nia atividade iha komunidade maibé Ministériu Agrikultura no Peska ninia odamatan kontinua nakloke nafatin ba ita bo’ot sira,” dehan Governante.
Jornalista : Tomé Amado
Editór : Agapito dos Santos
