DILI, 02 setembru 2020 (TATOLI)-Programa Dezenvolvimentu Nasaun Unidu (UNDP-sigla inglés) hamutuk ho Knua Juventude Fila Liman, tersa (01/09) lansa ona programa “Youtuber Sharing” atu oinsá jere rendimentu liuhosi youtube.
Sekretáriu Estadu Juventude no Desportu (SEJD), Abrão Saldanha, orgullu ho UNDP no Knua Juventude Fila Liman tanba hamosu ona inisiativa ne’e hodi kontribui ba prosesu dezenvolvimentu nasionál.
“Ha’u haksolok loos ohin bele mai iha ne’e haree foinsa’e milennial lubuk boot ida iha ne’e atu lansa sesaun aprende hamutuk ida entre joven sira kona-ba oinsá atu uza plataforma youtube, sai kriadór iha youtube no oinsá jera rendimentu ruma husi youtube,” dehan Abrão, liuhosi komunikadu imprensa ne’ebé Tatoli asesu kuarta ne’e.
Governante ne’e dehan lansamentu ne’e parte ida inísiu nian, no programa ne’e sei hala’o durante fulan-tolu ba oin.
“Ha’u kontente ho sesaun sira ne’e sei fó matadalan ba foinsa’e sira oinsá atu kria kanál youtube ne’ebé edukativu no atrativu,” tenik tan.
Partisipante youtuber sira sei hetan matadalan husi joven Timoroan sira iha YouTuber Community Timor-Leste (YCTL) ne’ebé sei fahe ho joven sira-nia esperénsia no lisaun hirak ne’ebé sira aprende iha sira-nia perkursu.
“Ha’u mai asume kargu Sekretariu Estadu Juventude ne’e ho vizaun ida ne’ebé hatur iha esperansa no fiar iha foinsa’e Timoroan sira, “FOINSA’E MILENNIAL FORSA KRIATIVA”.
Vizaun ida ne’e rekoñese kapasidade juventude sira-nian hanesan forsa ida ne’ebé bele kria solusaun ba problema ekonomia no sosiál ne’ebé ita-nia nasaun enfrenta, kria dalan ba sira-nia aan rasik, ba sira nia futuru no ba Timor-Leste nia futuru.
Governante ne’e apresia ho kreatividade joven sira-nia ne’ebé kria ona liuhosi vlog balun atrativu tebes.
“Joven ajuda nia maluk joven seluk atu bele pronunsia inglés ho di’ak hatudu Timor-Leste nia paisajen furak sira hanesan Illa Atauro no fatin furak sira seluk tan to’o promove Timor-Leste nia Kafé,” nia hateten.
“Ha’u hatene katak iha mundu Vlogging no Youtube, ita la’ós bele halo buat hotu. Maibé ha’u mós fiar katak liu husi youtube, joven sira bele promove sira nia kapasidade koletivu hanesan forsa ida ne’ebé sei lori Timor-Leste hakat tuir dalan lós ba futuru ida diakliu,” nia salienta.
Iha parte seluk Governu liuhosi SEJD sei ajuda foinsa’e sira atu sai husi persepsaun nagtivu maihosi públiku hasoru joven katak joven mak violentu no seluk tan.
“Serbisu tékniku sira komesa la’o ona atu buka identifika ita-nia maluk joven sira ne’ebé halo esforsu iha sira-nia moris lorloron atu halo buat ruma di’ak ba ita nia-rain,” nia hateten.
SEJD mós sei rekolla istóriu husi ema defisiénsia sira atu kontra sira-nia istoria kona-ba kontribuisaun no buka solusaun ba problema ekonomia no sosiál.
Jornalista : Hortencio Sanchez
Editór : Agapito dos Santos
