DILI, 07 setembru 2020 (TATOLI)- Komandu Polísia Munisípiu Covalima liuhusi Unidade Ema Vulneravel (PNTL-VPU) durante ne’e rejista kazu violénsia doméstika haat ne’ebé envolve menoridade sira.
Notísia Relevante : Hatudu Serbisu Di’ak, Xanana Kontinénsia Primeiru Sarjentu Amelia
Xefe Investigasaun VPU Covalima, Primeiru Sarjentu Amelia de Jesus Amaral, informa durante fulan janeiru too agostu 2020, sira rejistu kazu hamutuk haat.
“Ami rejista kazu abuzu seksuál ba menoridade hamutuk haat ne’ebé ninia prosesu kazu sira ne’e ami rekomenda ona ba Ministériu Públiku,” hateten Primeiru Sarjentu Amelia ba Agência Tatoli, ohin, iha Sentru Formasaun Polísia, Comoro, Dili.
Nia dehan, alende kazu violasaun seksuál ne’e, sira rejistu mós kazu koasaun seksuál ida, no kazu violénsia doméstika iha 32.
Autór sira ne’ebé komete iha kazu, VPU halo tiha investigasaun no rekomenda ba Ministériu Públiku hodi prosesa kazu sira ne’e ba Tribunál Distritál Suai hodi halo julgamentu.
Ba vítima sira ne’ebé trauma PNTL koopera ho uma mahon Madre Salele hodi fó protesaun moral no espirituál atu labele ta’uk bainhira hasoru problema hirak ne’e tenke koopera ho PNTL para defende vítima sira nia direitu tuir lei.
Iha parte seluk, Primeiru Sarjentu Amelia hato’o agradese ba Uniaun Europeia (UE) ho Inisiativa Spotlight ne’ebé fó apoiu formasaun ba PNTL-VPU) hodi hasa’e sira nia koñesimentu kombate krime Violasaun Seksuál (VS) no Abuzu Seksuál (AS) ba menoridade.
“Ha’u agradese ho formasaun ne’e hodi kapasita ami atu kombate krime abuzu seksuál ba labarik sira iha ita nia postu, suku no aldeia sira, hodi haree krime sira ne’ebé akontese tenke rekolla hodi prosesa autór sira tuir lei hodi tau matan ba feto no labarik sira ho dignu,” nia agradese.
Daudaun ne’e VPU Covalima iha rekursu na’in-11 ne’ebé hala’o servisu iha PNTL Covalima kobre too postu administrativu no suku.
Dezafiu servisu ne’ebé VPU Covalima enfrenta maka menus transporte no fasilidade servisu hanesan komputadór no materiál servisu seluk tan.
Jornalista : Eugénio Pereira
Editór : Francisco Simões
