DILI, 07 setembru 2020 (TATOLI)-Sekretaria Estadu Komunikasaun Sosiál (SEKOMS) kontinua promove programa “Naroman ba Suku” hodi benefisia komunidade iha área rurál.
Sekretaria Estadu Komunikasaun Sosiál, Merício Juvinal dos Reis ‘Akara’, hateten liuhosi programa ne’e komunidade iha suku ne’ebé sai benefisiáriu ba programa ne’e bele asesu ba Sentru Informasaun ne’ebé SEKOMS instala ona.
“Ita fasilita komunidade sira asesu informasaun liga ba dezenvolvimentu iha nível nasionál no joven sira hahú aproveita Sentru Informasaun hodi halo diskusaun, partisipa formasaun kona-ba oinsá sai jornalista lokál no halo proposta rasik ba sira-nia nesesidade suku,” dehan Sekretáriu Estadu Akara iha Palásiu Governu, hanesan haktuir iha nota ne’ebé Agência Tatoli asesu segunda ne’e.
Tuir Sekretáriu Estadu ne’e, iha futuru SEKOMS iha planu harii Biblioteka Komunitária nune’e bele fasilita komunidade asesu ba jornál no livru sira hodi promove ábitu lee.
“Ba oin SEKOMS sei deskute no halo planu hakarak kompleta ho Biblioteka Komunitária iha suku balun, atu nune’e jornál no livru balun iha instituisaun no ministériu relevante sira ne’ebé mak la uza ona bele transfere fali mai SEKOMS atu ita bele distribui fali ba Sentru Informasaun no sira bele aproveita hodi lee fali,” nia akresenta.
Aleinde ne’e, SEKOMS sei kontinua promove mós diálogu komunitáriu entre populasaun ho membru Governu sira no mantein komunikasaun entre sidadaun ho governante sira inklui autoridade lokál hodi fó solusaun ba problema ne’ebé komunidade suku hasoru.
Governante ne’e informa, durante tinan 2019 to’o 2020, SEKOMS konsentra uluk ba suku ualu, ne’ebé suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera.
Enkuantu iha tinan 2021, programa Naroman ba Suku sei implementa tan iha suku haat tuir kapasidade no rekursu ne’ebé SEKOMS iha.
Ba kada suku ne’ebé sai benefisiáriu, SEKOMS fó apoiu orsamentu maizumenus $10.000 liuhosi transferénsia públika hodi harii Sentru Informasaun ba komunidade no implementa programa Naroman ba Suku.
Programa ne’e lansa dahuluk iha loron 18 outubru 2019, iha suku Batumanu.
Programa Naroman ba Suku nu’udar programa pilotu hosi VIII Governu Konstitusionál liuhosi SEKOMS, ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.
Nune’e mós, informa preokupasaun komunidade kona-ba dezenvolvimentu no tranzmite ba ministériu relevante no hasa’e komunidade sira-nia koñesimentu kona-ba dalan no prosesu halo planu dezenvolvimentu, inklui iha nível suku, no prosesu implementasaun planu dezenvolvimentu no dalan ba povu nia partisipasaun no kontrolu.
Aleinde ne’e hasa’e partisipasaun ativa povu iha dezenvolvimentu nia prosesu tomak.
Jornalista: Natalino Costa
Editora: Julia Chatarina
