DILI, 08 setembru 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes, husu ba Governu halo polítika reparasaun ida oinsá fó tulun ba vítima sira ne’ebé hetan sofrimentu iha konflitu pasadu nian durante tinan 24 nia-laran.
Hugo Fernandes hateten. rekomemdasaun ne’ebé Comissão Acolhimento, Verdade e Reconciliação (CAVR” “Chega!” no Comissão Verdade e Amizade (CVA) “Memoriam Ad Spem” ne’e rekomenda ba Governu atu halo planu ba reparasaun mak liuhosi reparasaun individuál no reparasaun koletiva tanba polítika reparasaun ne’e mak sai aliserse polítika Estadu nian.
“Ha’u hanoin relatóriu CAVR no CVA nian iha pontu importante ida-ne’ebé aprende hosi ema-nia sofrimentu sira durante funu tinan 24 nia-laran ne’e, rekomenda ba Governu no Estadu atu halo polítika reparasaun nian maka hanesan reparasaun individuál no kolektiva. Tanba, polítika reparsaun ne’e mak loloos sai aliserse ba polítika tomak Estadu nian liuliu Timor-Leste oinsá tulun vítima sira hosi konflitu pasadu ne’e,” dehan Hugo Maria Fernandes ba Agência TATOLI iha nia knaar fatin, Antigu Komarka, Balide, Dili, kuarta (02/09/2020).
Diretór CNC ne’e esplika, polítika reparasaun individuál mak hanesan CNC harii ho nia mandatu ida katak oinsá mak atu tulun sobrevivente vuneravél ka bolu vítima sira hosi violasaun direitu umanu liuhosi bolsu estudu no polítia fó subsídiu ba idozu sira no veteranu sira.
“Oinsá maka CNC atu halo tulun vítima sira-ne’e mak dahuluk tenke rekoñese katak tinan 12 nia-laran laiha polítika ida hosi Governu ne’ebé maka dezeña atu tulun vítima sira hosi violasaun dereitu umanu pasadu nian. Hanesan ita haree no rona balun hosi polítika Governu nian katak ita hatene ona subsídiu ba veteranu sira, ita rona mós osan ba inan faluk sira, iha bolsu estudu hodi fasilita veteranu oan sira ba eskola iha rai liur. Maibé ho buat sira-ne’e bainhira ita halo revizaun tomak ba polítika Governu nian, laiha polítika ida ko’alia kona-ba vítima sira hosi violasaun direitu-umanu pasadu nian,” nia dehan.
Tanba ne’e, nia haktuir, iha tinan 2019 liubá CNC halo parseria ne’ebé maka di’ak tebes ho Ministériu Solidadridade Sosiál no Inkluzaun kona-ba rekursu finanseiru ne’ebé mak bele tulun vítima sira, maibé tanba orsamentu 2020 ne’e retiradu tiha entaun labele halo buat ida.
Maibé nia hatutan, CNC iha obrigasaun tenke halo kooperasaun aleinde ho MSSI iha mós Ministériu Saúde atu nune’e bele apoiu vítima sira hodi halo tratamentu saúde bainhira sira hetan moras. Tanba, CNC nu’udár Instituisaun Públiku ida Governu maka harii, obrigasaun CNC nian mak koopera ho Ministériu sira hanesan MSSI, MInitériu Saúde bele mós inkorpora hatama rekomendasaun sira-ne’e ba polítika sira-nian no apoiu hosi sosiedade sivíl sira mós la’o nafatin.
Maibé, nia dehan, antes CNC harii iha tiha ona sosiedade sivíl sira seluk ne’ebé maka ajuda ba vítima sira maka hanesan FOKUPERS, AJAR, HAK, Acbit, uma mahon sira mak diretamente hetan apoiu hosi Governu hafoin tulun fila-fali ba vítima sira. Nia dehan, Governu mós tulun iha forma oi-oin hanesan apoiu finanseiru no balu apoiu ba tratamentu saúde ne’ebé mak halo tiha ona dezde perídu 2010 nian to’o mai agora.
“Apoiu finanseiru hanesan iha forma ida ne’ebé mak iha polítika hakbiit vítima sira-ne’e seidauk halo maibé insidentál sira-ne’e ita fó hanesan tulun vítima ruma mate, CNC fó hela apoiu. Ezemplu, ha’u bele dehan katak apoiu ba saúde mental, ita koopera ho PRADET iha vítima ida ka rua, ita rekomenda ba PRADET atu halo tratamentu saúde mentál ba sira no sira-ne’ebé mak iha saúde fíziku mak durante ne’e. Ita seidauk iha progresu di’ak tanba to’o agora ita rezistu maibé kondisaun atuál moras sira-ne’e dalaruma sira la ko’alia sai entaun derepente de’it ita rona mate ona,” nia hateten.
Entretantu, nia esplika, kona-ba polítika reparasaun kolektiva mak ko’alia kona-ba oinsá harii monumentu iha fatin akontesimentu Masakre sira-ne’e. Maibé, nia rekuñese, durante ne’e haree monumentu barak hanesan iha Miaputine iha Laútem, Kraras iha Viqueque, monumentu sira-ne’e hotu inisiativa hosi família vítima nian no hosi Asosiasaun Vítima sira maka halibur malu no hetan apoiu hosi Autoridade Lokál no Governu ne’e uitoan.
“Ita haree monumentu no memoriál barak harii ne’e apoiu hosi Governu ne’e mínimu loos. Tanba, ita sei iha dezafiu ida oinsá mak atu involve Autoridade Lokál to’o mai iha Ministériu sira iha leten ne’e atu partisipa mós, maibé ha’u hein katak tinan ne’e halo mapeamentu ona, ita hakerek narativa kada fatin istóriku sira ne’e hotu, tanba ne’e hein katak ba oin Governu mak iha proativamente apoiu inisiativa komunidade nian,” nia dehan.
1. Definisaun Reparasaun
Durante períodu ne’ebé hala’o ninia servisu, CAVR define reparasaun nu’udar medida atu hadi’ak fali estragu ne’ebé vítima sira hetan kona-ba abuzu direitu umanu inkluindu reabilitasaun, restituisaun, kompensasaun, rekoñesimentu kona-ba akontesimentu loloos ne’ebé mosu.
CAVR tau reparassaun iha direitu hmanu nia kuadru de servisu ne’ebé inklui mós komponente esensiál tolu (3) ne’ebé labele troka malu mak lia-loos, justisa, no reparasaun. Forma balun kona-ba reparasaun mak hanesan; kompensasaun ne’ebé inklui katak fó konpensasaun ne’ebé loloos liuhosi rezolve tuir lei ka mediasaun, restituisaun signifika hatur fali-tuir bele-kona-ba situasaun ne’ebé uluk benefisiariu ne’e iha molok violasaun mosu ba nia, reabilitasaun katak halo provizaun médiku no kuidadu psikolojiku no fó resposta signifikante ba ema ida-idak no komunidade nia nesesidade, restaurasaun ba dignidade ne’ebé inklui mós forma simbóliku hosi reparasaun, no garante atu la repete tan mak prevene atu violasaun direitu umanu sei la mosu tan.
2. Prinsipiu ne’ebé orientasaun nian ba programa reparasaun iha Timor-Leste
Prinsipiu sira tuir mai ne’e sei asisti atu dezenvolve programa reparasaun ida-ne’ebé efetivu ba vítima sira ne’ebée vulneravel liu kona-ba violasaun direitu umanu nian iha Timor-Leste mak hanesan:
a. Fizibilidadi (Pratikalidadi)
Timor-Leste hanesan nasaun foun ida iha faze inisiál dezenvolvimentu nian hasoru difikuldade barak. Atu iha fizibilidade iha kontestu ida-ne’e nia laran, programa reparasaun ida-ne’e tenke seletivu no haree liuliu kona-ba nesesidades ne’ebé urjente liu kona-ba sira ne’ebé vulneravel liu no, iha ne’ebé bele, fó resposta koletivu ne’ebé folin ladún makaas no kreativu.
b. Asesibilidade
Tenke tau matan didi’ak atu bele laran metin katak vítima sira ne’ebé oras ne’e hetan susar la’ó de’it tanba konsekuénsia maibé tanba sira-nia esperiénsia no mós tanba nia izolamentu, la hetan informasaun no meiu transporte, liuliu sira ne’ebé hela iha área rural.
c. Hakbiit
Programa ida-ne’e tuir loos tenke hakbiit sira ne’ebé hetan terus tanba violasaun direitu umanu ne’ebé grave atu sira bele kontrola rasik sira-nia moris no kore-aan hosi limitasaun pratika no psikolojiku no vítima nia sentimentu emosionál. Bainhira fó tulun reabilitasaun no medida reparasaun seluk tan di’ak liu se uza dalan hakbesik atu hakbiit nian ida ne’ebé haree liuliu ba vítima sira no bazeadu ba komunidade.
d. Jéneru
Programa ne’e tenke hanoin kona-ba diferensa iha jender tanba konflitu iha Timor-Leste afeta ba mane no feto. Mane no feto sira la’ós liu de’it hosi eeperiésia oin-oin kona ba violasaun direitu umanu nian iha konflitu nia laran, maibé satan dalan oin-oin atu hakmaan impaktu kona-ba violénsia hirak ne’e. Mane barak liu mak sai nu’udar alvu vítima kona ba detensaun, tortura, oho no lori lakon. Maibe, bainhira feto sira sai vítima kona ba detensaun, tortura no violasaun seluk tan, sira terus makaas liu iha violasaun seksuál no sei hetan diskriminasaun nafatin hanesan v’itima.
Feto sira mós terus bainhira sira-nia laen, oan mane, aman, no membru seluk tan hosi sira-nia família hetan violasaun direitu umanus. Sira mak sai nu’udar responsavel atu tau matan ba sira-nia família, sai responsavel ba hirak ne’ebé moras no kanek, no servisu hodi fó han sira-nia oan no dependente seluk tan bainhira hirak ne’ebé tenke fó han família hirak ne’e mós ema lori ba dadur, lori lakon tiha, oho ka aleija tiha. Sira mós sai vulneravel makaas liután ba violénsia seksuál bainhira sira-nia “protetor” tradisionál família nian laiha. Pelumenus 50% hosi rekursu programa ida-ne’e nian tenke aloka ba iha feto benefisiária sira.
3. Métodu Reparasaun
Tenke dezenvolve métodu atu fó tulun programa reparasaun nian maibé tenke iha konsulta mós ho vítima sira no grupu víima nian no inklui buat sira tuir mai ne’e:
a. Apoiu ba inan sira ne’ebé seidauk kaben no bolsa estudu ba sira-nia oan
Programa ida-ne’e sei fó tulun liuhosi bolsa estudu ba inan sira n’e’ebe seidauk kaben, inkluindu vítima hosi violénsia seksuál no faluk tanba funu sira-nia oan sira-ne’ebé sei ho idade atu ba eskola nian, to’o labarik hirak ne’e halo ona tinan 18. Pakote ida-ne’e mak hanesan fó tulun osan atu selu eskola no kustu sele-seluk tan no Governu nia ajénsia mak kaer administrasaun no ka ONG sira iha nivel distritu.
b. Apoiu ba invalidu sira, faluk sira, no sobrevivente hosi violénsia seksuál no tortura
Programa ne’e sei fó tulun sosiál ba faluk sira, ba sobrevivente hosi violénsia seksuál (ne’ebé laiha labarik ho tinan atu ba eskola nian), ba invalidu sira, no sobrevivente hosi tortura, inkluindu reabilitasaun, treinu kona-ba abilidade no asesu ba mikro-kréditu atu bele hala’o atividade iha moris loro-loron nian. Tulun hirak ne’e, Governu nia aj’ensia no ONG espesializadu sira no ONG sira ne’ebé komunidade nian mak hala’o.
c. Apoiu ba komunidade hirak ne’ebé afetadu makaas liu
Programa ne’e sei fó apoiu ba komunidade hirak ne’ebé hetan terus makaas, ne’ebé hamutuk halo proposta koletiva ida ba reparasaun. Tau mós iha proposta nia laran esplikasaun kona-ba oinsá komunidade ne’e hetan terus durante tempu konflitu no iha termu jerál, violénsia ne’ebé sira hasoru, projetu espesifiku ida atu bele hakmaan estragu ne’ebé hetan hosi terus, no lista ida kona-ba benefisiáriu hirak ne’ebé sei tama iha atividade ida-ne’e.
Ajénsia Governu nian hanesan ONG sira mós bele uza programa ida-ne’e hodi halo atividade mak hanesan halo kolokiu kona-ba kura no servisu seluk tan hodi restaura, inkluindu terapia kreativu no atividade sira mak hanesan teatru, arte vizual, múzika no reza. Balansu ba jéneru kona-ba benefisiáriu sira sai nu’udar kriteria atu hetan tulun.
Memorializasaun
Programa ne’e sei promove momorializasaun nasionál liuhosi konsulta ho vítima no mós parseiru seluk tan inkluindu Governu. Programa memorializasaun ne’e liuhosi dalan maibé la’ós limitadu ba, hahalok aat ne’ebé hetan diskrisaun iha relatóriu ida-ne’e, no inklui serimónia komemorasaun nian, data, monumentu, no inisiativa sira seluk atu fó honra no hanoin nafatin vítima hosi violasaun direitu umanu iha nivel komunidade lokál no nasionál.
Memorializasaun mós inklui atu dezenvolve materiál edukasaun nian kona-ba Timor-Leste nia luta istóriku hodi nune’e kaer metin direitu umanus, dezenvolve literatura populár, múzika no arte hodi fó hanoin, no hanesan rekomenda ona iha fatin seluk hosi relatóriu ida-ne’e–programa edukasaun ida atu promove kultura ida kona-ba rezolusaun lahó violénsia nian kona-ba konflitu.
Jornalista: Osória Marques
Editór: Cancio Ximenes
