DILI, 08 setembru 2020 (TATOLI)-Sekretaria Estadu Komunikasaun Sosiál (SEKOMS) liuhosi ekipa tékniku no diretór sira hahú halo preparasaun téknika atu estabelese Diresaun Nasionál Dezenvolvimentu Mídia Munisípiu.
Diresaun ne’e, hanesan diresaun foun ne’ebé sei tutela iha (SEKOMS), bazeia delegasaun kompeténsia ne’ebé atribui husi Ministériu Asuntu Parlamentár no Komunikasaun Sosiál (MAPKOMS).
Sekretáriu Estadu ba Komunikasaun Sosiál, Merício Juvinal dos Reis ‘Akara’, hateten daudaun ne’e ekipa tékniku sira hahú elabora konseitu, programa prioridade, vizaun, termu referénsia no orsamentu ne’ebé sei aloka ba diresaun foun ne’e.
“Ita nafatin hein orgánika MAPKOMS ne’ebé Prezidente Repúblika sei aprova, maibé iha nível tékniku ita prepara daudaun ona, ita bele dehan serbisu kuaze porsentu 90 iha nível vizaun, programa, atividade inklui termu referénsia. Bainhira hala’o atividade karik termu referénsia iha ona, ekipa mós prepara daudaun konseitu no alokasaun orsamentu ne’ebé maka ita sei tau iha 2021,” tenik Sekretáriu Estadu Akara, liuhosi nota ne’ebé Agência Tatoli asesu, tersa ne’e.
Ezekutivu ne’e reforsa, SEKOMS hahú halo kolaborasaun ho Prezidente Autoridade Munisípiu balun atu fasilita prosesu implementasaun planu dezenvolvimentu mídia munisípiu no autoridade munisipál sira mós disponível atu kolabora hodi apoia polítika ne’e.
SEKOMS iha polítika atu desentraliza kobertura mídia la’ós de’it iha nível nasionál maibé to’o mós nível munisípiu ho intesaun atu fasilita sidadaun sira asesu ba informasaun.
“Ita hakarak desentraliza kobertura no knaar mídia nian to’o munisípiu atu fasilita ita-nia sidadaun sira iha área rurál, tanba durante ne’e ita konsentra demais iha nasionál, entaun munisípiu ladún hetan kobertura hanesan iha postu no suku sira,” dehan Akara.
Aleinde ne’e, SEKOMS planeia halo kordenasaun ho mídia estatál sira atu koloka sira-nia korespondente iha munisípiu nune’e bele kobre informasaun sira to’o iha área rurál sira ne’ebé durante ne’e la hetan kobertura mídia.
“Durante ne’e ita iha Rádiu Televizaun Timor-Leste (RTTL), Agência Tatoli no Rádiu Komunidade ne’ebé mak Estadu fó subsídiu, entaun ita bele koordena ho sira atu destaka ajente iha kada munisípiu. RTTL dadaun ne’e iha ona no Tatoli mós iha planu atu dezenvolve sira-nia jornalista iha nível munisípiu no estasaun rádiu komunidade 16 mós durante ne’e eziste ona iha munisípiu, ita reforsa tan atu sira halo knaar di’ak liután,” nia informa.
SEKOMS mós sei koordena ho mídia privadu sira hanesan Timor Post, STL, Independente, Diáriu Nasionál, Dili Post no mídia online sira, nune’e bainhira dezenvolvimentu infraestrutura mídia munisípiu funsiona ona, mídia hirak ne’e bele aproveita hodi asesu mós ba informasaun sira.
Ezisténsia mídia munisípiu importante atu diversifika informasaun liuhosi plataforma online no rádiu streaming, atu ema hotu bele hetan asesu inklui dezenvolve jornál parede hanesan meiu komunikasaun ne’ebé antes ne’e eziste ona.
Nune’e, governante ne’e hein katak ho aprovasaun orsamentu ba tinan 2021 bele hahú ona programa ne’e iha munisípiu sira ne’ebé iha ona kondisaun atu implementa planu.
Jornalista: Florêncio Miranda Ximenes
Editora: Julia Chatarina
